अभिनेत्री आशिका तामाङलाई चिन्नुहुन्छ ? यदी चिन्नुहुन्न भने फिल्म ‘सुश्री’ हेर्नुहोला । अभिनेता आर्यन सिग्देलसँग रोमान्स गर्ने अभिनेत्री उनी नै हुन् । उक्त फिल्म उनको डेब्यु थियो । १ करोड लगानी लगाएर उनी आफैं हिरोइन बनेकी थिइन् । तर, फिल्म बक्सअफिसमा डिजास्टर साबित भयो ।
हलिउड अभिनेत्रीद्वय किम कार्दशियन र एन्जेलिना जोलीसँग आफ्नो फिगर दाँज्न रुचाउने उनलाई ‘खसिनी काण्ड’ ले एकाएक चर्चामा ल्याएको थियो । हालै जर्मनीबाट लगभग २ वर्षको बसाईकालागि नेपाल आएकी उनी २ घण्टाको फिल्मले नचिनाएको आफूलाई २ मिनेटको भिडियोले सबैमाझ चिनिएको बताउँछिन् ।
अब उनी पुनः फिल्म निर्माण गर्ने सोचमा छिन् । ‘‘सुश्री’ बाट एक करोडभन्दा बढी डुबाएँ । अब डेब्यु फिल्ममा भएको घाटा उठाउने गरि फर्किएको छु । नेपाल बसाईको क्रममा फिल्म निर्माण गरेर र हिट बनाएरै जर्मनी फर्किन्छु’, उनी भन्छिन् । उनले फिल्म बनाउन हतार भने नगर्ने बताइन् ।
आशिका अगाडि भन्छिन्, ‘पहिला फिल्म गर्दा केही थाहा थिएन । अन्धाधुन्ध फिल्म निर्माण र अभिनयमा होमिएँ । अब हतार गर्दिनँ । पहिला सबै बुझ्छु । अग्रजहरुसँग सल्लाह लिन्छु अनि मात्र फिल्म बनाउँछु ।’ फेरि हिरोइन बन्ने हो रु फिल्मीखबरको प्रश्नमा उनी भन्छिन्, ‘अहिले नै यस विषयमा सोचेकी छैनँ ।’
हरेक वर्ष ९० प्रतिशतभन्दा बढी फिल्मका निर्माताले करोडौं डुबाउने गरेको बताउँदै आशिका, आफूले एक करोड डुबाए पनि धेरै सिक्न पाएको बताउँछिन् । भन्छिन्, ‘नेपालमा ५/१० प्रतिशत फिल्ममात्र हिट छन् । अब त्यसमा म पनि परेरै छाड्छु ।’ उनलाई अभिनेता आकाश श्रेष्ठसँग भने रोमान्स गर्ने इच्छा रहेछ ।
(फिल्मी खबरबाट साभार)
८ मंसिर २०७५, शनिबार १५:५८ प्रकाशित
