बाँकेको कोहलपुरमा आयोजना गरीएको कोहलपुर खुल्ला क्रिकेट प्रतियोगिताको उपाधि बिबी वारियर्स नेपालगन्जले जितेको छ । शारदा एजुकेशन पार्कको आयोजनामा कोहलपुरस्थित प्रस्तावित अन्तराष्ट्रिय क्रिकेट मैदानमा शनिबार भएको फाईनल खेलमा आयोजक टिम कोहलपुर क्रिकेट एकेडेमीलाई ४ विकेटले पराजित गर्दै बिबी वारियर्सले उपाधिमाथी कब्जा जमाएको हो ।
खेलमा पहिले ब्याटिंग गर्दै कोहलपुरले दिएको ९४ रनको लक्ष्य बिबी वारियर्सले १५.३ ओभरमा ६ विकेट गुमाएर पुरा गर्यो । वारियर्सको लागि अमर सिंह रौटेलाले सर्वाधिक २९ रन, सुनिल भण्डारीले २६ रन तथा विजय चौधरीले १३ रन बनाए । कोहलपुर एकेडेमीको बलिंगमा रुपेश कुर्मीले २ विकेट तथा अजय शहानी, रोशन शाह, लभकुश यादव र सुरज दासले समान १ विकेट लिए ।
यस अघि टस हारेर ब्याटिंग गरेको कोहलपुर क्रिकेट एकेडेमीले निर्धारित २० ओभरमा ९ विकेट गुमाएर ९३ रन बनाएको थियो । उसको लागि सन्दिप नेपालीले सर्वाधिक अविजित ३१ रन, शेर बहादुर ओलीले १४ रन तथा रमेश सिंहले १० रन बनाए । बिबी वारियर्सको बलिंगमा बिशाल पौडेलले सर्वाधिक ३ विकेट तथा सिद्धान्त राज शाही, अमर सिंह रौटेला र आकाश विष्टले समान २ विकेट लिए ।
खेलको प्लेयर अफ द म्याच बिबी वारियर्सका अमर सिंह रौटेला चुनिए ।
प्रतियोगितामा द्धितिय हुन सफल कोहलपुर क्रिकेट एकेडेमीको टिम ।
प्रतियोगिताको उपाधि सहित बिबी वारियर्सले ५० हजार रुपैयाँ प्राप्त गर्यो भने उपविजेता टोलि कोहलपुर क्रिकेट एकेडेमीले २५ हजार रुपैयाँ प्राप्त गर्यो । प्रतियोगिताको उत्कृष्ठ खेलाडी बन्दै बिबी वारियर्सका कप्तान सिद्धान्त राज शाहीले १० हजार रुपैयाँ पाए । यस्तै प्रतियोगिताको उत्कृष्ठ बलर आकाश बिस्ट तथा उत्कृष्ठ ब्याट्सम्यान शुबेन्दु पाण्डे चुनिए । तिनै जनालाई जनही ५ हजार रुपैयाँले पुरस्कृत गरीयो ।
विजेता खेलाडीहरुलाई प्रमुख अतिथि राष्ट्रिय खेलकुद परिषदका प्रशिक्षक दिपेन्द्र प्रताप सिंह, विशिष्ट अतिथि राष्ट्रिय क्रिकेट टिमका पूर्व कप्तान लेख बहादुर क्षेत्री, बाँके जिल्ला क्रिकेट संघका सदस्य तथा अन्तर्राष्ट्रिय अम्पायर मनमोहन लम्साल, बिबी साइकलका प्रोपाइटर सरिफ बागवान लगायतले पुरस्कार वितरण गरे ।
पुष २० गते देखि सुरु भएको प्रतियोगितामा देशभरका १६ टोलिको सहभागीता रहेको थियो ।
