१३ साउन, काेहलपुर। बाँकेको कोहलपुर नगरपालिका-३, शान्तिटोलमा निर्माणाधीन सेफ्टी ट्याङ्कीभित्र फसेका तीन मजदुरको मृत्यु भएको छ।

बुधबार बिहान दयाप्रसाद थारुको निर्माणाधीन घरको आँगनमा बनाइँदै गरेको सेफ्टी ट्याङ्कीभित्र पसेका तीन जनाकाे मृत्यु भएकाे हाे । उनिहरू बिहान ९ बजे सेफ्टिट्याङ्कीमा फसेका थिए ।

इलाका प्रहरी कार्यालय काेहलपुरका अनुसार जेसीबीको सहायताले सेफ्टी ट्याङ्की फुटाएर तीनै जनालाई बाहिर निकालिएको भए पनि उनीहरूलाई मृत अवस्थामा फेला पारिएको हो।

मृत्यु हुनेमा कोहलपुर नगरपालिका-३ का करिब ४२ वर्षीय कालु थारु, २७ वर्षीय प्रकाश थारु र ३४ वर्षीय बिर्जा थारु रहेका छन्।

घटनाको कारणबारे प्रहरीले प्रारम्भिक अनुसन्धान गरिरहेको जनाएको छ। मृतकहरूको शव पोस्टमार्टमका लागि भेरी अस्पताल, नेपालगञ्ज पठाईएकाे प्रहरीले जनाएको छ।