३१ बैशाख, काेहलपुर । लागुऔषध नियन्त्रण ब्यूरो नेपालगन्जले खैरो हेरोइनसहित तीन जनालाई पक्राउ गरेको छ। लागुऔषध नियन्त्रण ब्यूरो शाखा कार्यालय नेपालगन्जको टोलीले बैजनाथ गाउँपालिका-५ छमनिया बस्ने २४ वर्षीय वीरबहादुर थारुलाई पक्राउ गरेको हो।

विशेष सूचनाका आधारमा प्रहरी सहायक निरीक्षक नवीन शाहीको कमाण्डमा खटिएको टोलीले मंगलबार साँझ करिब ५:३० बजे थारुको घरमा छापा मारेको थियो।

खानतलासीका क्रममा थारुले सुत्ने खाटको सिरानीमुनि कालो प्लास्टिकमा पुरिया बनाएर लुकाइराखेको अवस्थामा खैरो हेरोइन फेला परेको ब्यूरोले जनाएको छ। बरामद पदार्थ प्लास्टिकसहित ४ ग्राम ६१० मिलिग्राम र प्लास्टिक हटाउँदा ४ ग्राम २२० मिलिग्राम खैरो हेरोइन रहेको पुष्टि भएको छ। साथै एक थान मोबाइलसमेत बरामद गरिएको छ।

यसैबीच, अर्को अपरेशनमा बैजनाथ गाउँपालिका-१ र २ को सिमाना मुलाटाँटी क्षेत्रबाट थप दुई जनालाई पक्राउ गरिएको छ। पक्राउ पर्नेमा २८ वर्षीय यामबहादुर बुढा र ३३ वर्षीय टोपबहादुर रोकाया रहेका छन्।

उनीहरू बसेको स्थान तथा शरीर खानतलासी गर्दा रातो प्लास्टिकले बेरेर राखिएको ६५ पुरिया खैरो हेरोइन फेला परेको प्रहरीले जनाएको छ।

उक्त पदार्थ प्लास्टिकसहित ३ ग्राम ३५० मिलिग्राम र प्लास्टिक हटाउँदा २ ग्राम ११० मिलिग्राम रहेको पुष्टि भएको छ।

पक्राउ परेका तीनै जनालाई आवश्यक अनुसन्धान तथा कारबाहीका लागि इलाका प्रहरी कार्यालय कोहलपुरमा बुझाइएको लागुऔषध नियन्त्रण ब्यूरो नेपालगन्जले जनाएको छ।