चोरी तथा डकैती मुद्दामा अदालतले एक सय २९ वर्ष जेल सजाय तथा १४ लाख जरिवाना तोकेका फरार व्यक्तिलाई सिन्धुली प्रहरीले पक्राउ गरेको छ ।
अदालतले कैद तथा जरिवाना तोकेका तर फरार रहेका प्रतिवादीहरुको खोजी गर्ने क्रममा सिन्धुली प्रहरीका प्रमुख एसपी गोविन्द थपलियाकै विशेष निर्देशन र पहलमा ती व्यक्ति पक्राउ परेका हुन् ।
अदालतबाट प्राप्त फरार सूची अध्ययन गर्ने क्रममा १ सय २९ वर्ष ७ महिना कैद सजाय तोकेका व्यक्ति रहेको पत्ता लागेपछि एसपी थपलियाले प्रतिवादीको खोजी कडाईका साथ गरेका थिए ।
खोजी गर्ने क्रममा तिनपाटन गाउँपालिका १ (साविक बेलघारी गाविस ३) का मगर कान्छा भन्ने मेषबहादुर थापालाई सोमबार साँझ ५ बजे बेलघारीबाट पक्राउ गरिएको सिन्धुली प्रहरीले जनाएको छ ।
मेषबहादुरलाई छ वटा चोरी मुद्दा र १२ वटा डाँका चोरी मुद्दामा तनहुँ जिल्ला अदालतले २०७१ वैशाख १७ गते र २०७२ जेठ ४ गतेको फैसलाले सो कैद सजाय र जरिवाना तोकेको थियो ।
उनी चोरी तथा डाका मुद्दामा फरार थिए । प्रहरीले खोजविन गर्ने क्रममा उनलाई सोमबार साँझ पक्राउ गरिएको एसपी गोविन्द थपलियाले जानकारी दिए ।
पक्राउ परेका मेषबहादुरलाई आवश्यक कारवाहीका लागि सिन्धुली जिल्ला अदालतमा पेश गरिएको छ ।
२१ मंसिर २०७८, मंगलवार १६:१७ प्रकाशित
