७ असोज, कोहलपुर । लुम्बिनी प्रदेशका मुख्यमन्त्री चेतनारायण आचार्यले बाँकेमा जेन-जी आन्दोलनका क्रममा प्रदर्शनकारीले तोडफोड, आगजनी र लुटपाट गरेका कार्यालयको निरीक्षण गरेका छन् ।

उनले कोहलपुर नगरपालिकाको भवन निरीक्षणपछि सञ्चारकर्मीसँग बोल्दै जनताको सेवा गर्ने कार्यालय तोडफोड गर्नु, जलाउनु र लुटपाट गर्नु निन्दनीय भएको बताए ।

मुख्यमन्त्री आचार्यले लुम्बिनी प्रदेशमा दुई अर्बभन्दा बढीको भौतिक क्षति भएको जानकारी दिँदै धेरै कार्यालयबाट सेवा दिन कठिनाइ भइरहेको बताए । “आन्दोलनको नाममा कागजात र लगत जलाएर जनतालाई दुःख दिने काम भएको छ” उनले भने ।

भदौ २४ गते बाँकेका दुई दर्जन कार्यालयमा तोडफोड, आगजनी र लुटपाट भएका थिए ।