बाँकेमा संचालित विद्यालय कर्मचारीहरु आन्दोलित भएका छन् । लामो समयदेखि विद्यालय कर्मचारीमाथि चरम शोषण र दमनमा भइरहेको भन्दै उनीहरुले आईतबार जिल्ला प्रशासन कार्यालय र जिल्ला शिक्षा विकास तथा समन्य इकाई बाँकेमा ज्ञापन पत्र बुझाएका छन् ।
विद्यालय कर्मचारी संयुक्त आन्दोलन परिचालन समितीका बाँके संयोजक विरेन्द्र यादवले जिल्लाका विद्यालयमा कर्मचारीहरुको चरम शोषण भइरहेको बताए । सर्वाेच्च अदालतले २०६७ सालमा विद्यालय कर्मचारीहरुको सेवा, शर्त र सुविधा निश्चित गरि सेवा कानुन बनाई लागु गर्नु भनि दिएको आदेश कार्यान्वयन नभएको र शिक्षा ऐनमा कर्मचारीहरुलाई झुक्याउने गरि अस्पष्ट व्यवस्था गरिएको भन्दै आन्दोलन सुरु गरिएको यादवको भनाई छ ।
आन्दोलनको केन्द्रिय कार्यक्रम अनुसार उनीहरुले माग पुरा गराउन कालोपट्टि बाँधेर काम गर्नेदेखि काठमाडौमा रिले अनसनसम्मका कार्यक्रम तय भएको बताएका छन् । उनीहरुले माग पुरा नभए विद्यालय बन्द गर्न बाध्य हुने चेतावनी समेत दिएका छन ।
३१ भाद्र २०७५, आईतवार २०:१७ प्रकाशित
