२ भदाै, काेहलपुर । बाँकेको कोहलपुरबाट प्रहरीले ठूलो परिमाणमा लागूऔषध अफिमसहित दुई जनालाई पक्राउ गरेको छ । पक्राउ पर्नेमा रुकुम पूर्व सिस्ने गाउँपालिका-१ का ४३ वर्षीय कर्णबहादुर बुढा र बाँकेको कोहलपुर नगरपालिका-६ का ६० वर्षीय टोपजंग गिरी रहेका छन् ।
लागूऔषध बिक्री-वितरण गर्ने गिरोहको निगरानी गर्ने क्रममा लागूऔषध नियन्त्रण ब्यूरो शाखा कार्यालय नेपालगन्ज र सुर्खेतबाट खटिएको संयुक्त प्रहरी टोलीले उनीहरूलाई नियन्त्रणमा लिएको हो ।
प्रहरीका अनुसार भदाै १ गते कोहलपुर नगरपालिका-६ बाट लागूऔषध अफिमको कारोबार गरिरहेको अवस्थामा उनीहरूलाई नियन्त्रणमा लिन खोज्दा प्रहरीलाई छलेर भाग्न खोजेका थिए । त्यस क्रममा उनीहरूलाई रोक्न प्रहरीले १ राउन्ड हवाई फायर गरेको थियो ।
प्रहरीले उनीहरूको साथबाट १४ किलो ७६० ग्राम लागूऔषध अफिम बरामद गरेको जनाएको छ । साथै उनीहरूको साथबाट २ थान मोबाइल फोन समेत बरामद गरिएको छ ।
पक्राउ परेका दुवै जनामाथि थप अनुसन्धान तथा आवश्यक कानुनी कारबाहीका लागि इलाका प्रहरी कार्यालय कोहलपुर, बाँकेमा बुझाइएको लागूऔषध नियन्त्रण ब्यूरोले जनाएको छ ।
