१५ माघ, नेपालगन्ज । नेपालगञ्ज उपमहानगरपालिकाले खरिद गरेका नगर बस थन्किएकाे लामाे समयसम्म पनि संचालनमा आउन सकेका छैनन् ।

तीन करोड रुपियाँ बढी खर्च गरी खरिद गरीएका बस लामाे समयदेखि नेपालगन्ज बसपार्कमा थन्किएका छन ।

नेपालगन्ज उपमहानगरपालिकामा डा. धवलशम्सेर राणा मेयर हुँदा नगर कार्यसमितिले निर्णय गरि सात वटा बस खरिद गरेको थियो । शुरुआती चरणमा ठुलै तामझाम गरिएको भए पनि उपमहानगरपालिकाकै उदासीनता र लापरवाहीले अहिले ती बस बसपार्कमा अलपत्र अवस्थामा थन्काइएका छन ।

२०७६ असार २५ गते तीन करोड पाँच लाख ७५ हजार ८४० रुपियाँमा लुम्बिनी प्रदेश सरकारको विशेष अनुदानको रकमबाट सातवटा नगर बस खरिद गरिएको थियो । तीनमध्ये चारवटा बस केही समय सञ्चालनमा रहे पनि तीनवटा बस भने विगत दुई वर्षदेखि थन्किएका छन् ।

राजस्व शाखा प्रमुख वीरबहादुर थापाका अनुसार सातवटा बसको वार्षिक ५० लाख र नेपालगञ्ज बसपार्कको पार्किङ शुल्क ५१ लाख न्यूनतम मूल्य कायम गरी टेण्डर आह्वान भएकोमा शिवशक्ति जनरल अर्डर सप्लायर्सले वार्षिक एक करोड ३७ लाख ५१ हजार रुपियाँमा ठेक्का स्वीकार गरेको थियाे । तर ठेक्कामा लिए पनि ति बस सन्चालनमा आउन सकेका छैनन् ।

सप्लायर्सका प्रतिनिधि विनोद थापाले नगरभित्र चलाउँदा डिजेलको मूल्य समेत उठ्न नसक्ने भए पछि बसहरु सञ्चालन नगरी राखिएको जानकारी दिए । सम्झौताको अवधि पाँच वर्षको छ ।

लक्षित वर्गका लागि प्राप्त अनुदानमा नगर बस खरिद गरी राज्यको धनराशी खर्च भए पनि उपलब्धि नभएको भन्दै नगरवासीले चिन्ता र चासो व्यक्त गरेका छन् ।