२७ कात्तिक, काठमाण्डौं । क्याप्टेन पूजा महतोको अलराउण्ड प्रदर्शनमा आईसीसी यू-१९ टी-२० महिला विश्वकपको एसियाली छनोटमा नेपालले कुवेतविरुद्ध सानदार जित निकालेको छ । नेपालले कुवेतलाई १६५ रनको फराकिलो अन्तरमा पराजित गरेको हो ।

नेपालले दिएको २१४ रनको उच्च रनको लक्ष्य पछ्याएको कुवेत १३ ओभरमा ४८ रन बनाउँदै अलआउट भयो ।

कुवेतलाई सस्तैमा समेट्न क्याप्टेन पूजा महतोले ५ विकेट लिइन् ।

यसअघि कप्तान पूजा महतोको कीर्तिमानी शतक बनाएपछि नेपालले निर्धारित ओभरमा २ विकेट गुमाएर २१३ रनको विशाल योगफल तयार पारेको थियो ।

पूजाले कुल ६९ बलको सामना गर्दै १७ चौकाको मद्दतले नटआउट १३० रन जोडिन् । उनलाई उत्कृष्ट सहयोग गर्ने क्रममा सोनी पाख्रीनले ३३ बलमा ४३ रन जोडिन । उनीहरूबाहेक सावित्री धामीले ११ र साना प्रविनले ६ रनको योगदान दिइन ।