८ भदाै, नेपालगन्ज । भारतबाट परीक्षणबिनै अवैद्य रुपमा दुध भित्रिने गरेको छ । जिल्ला दुग्ध व्यवसायी सङ्घ बाँकेले गरेको अनुगमनमा दैनिक आठ हजार लिटर दुध बाँकेमा भित्रिने गरेको पाइएको हो ।
जिल्ला दुग्ध व्यवसायी सझ्घ बाँकेका अध्यक्ष दीपकराज भण्डारीले दुधको गुणस्तरीयता जाँच र भन्सार नगरीकनै भारतबाट दैनिक आठ हजार लिटर बढी दुध अवैध रुपमा आयात भइरहेकोले जिल्लाका किसानहरुको दुध बिक्री हुन नसकेको बताए । उनले यसरी गुरणस्तर परीक्षणबिनै भित्रिरहेको दुधले नेपाली उपभोक्ता, किसान र व्यवसायी सबैलाई समस्यामा पारेकोले सो रोक्न जिल्ला प्रशासनसँग माग गरिएको बताए ।
स्थानीय किसान र व्यवसायी दुबैले भारतीय गुणस्तरहीन दुधका कारण यहाँका दुध उत्पादक किसान र दुध विक्रेता दुबै पीडित बनेको बताएका छन् । दुधको गुणस्तरीयता जाँच र भन्सार नगरीकनै दुध आयात भइरहेकोले जिल्लाका किसानहरुको दुध बिक्री हुन नसकेको जिल्ला दुग्ध व्यवसायी सङ्घ बाँकेले जनाएको छ ।
जिल्ला दुग्ध व्यवसायी सङ्घ बाँकेका अध्यक्ष भण्डारीले भारतीय दुधकै कारण बाँकेमा मिल्क होलिडे (दुध बिक्री नहुने अवस्था) आएको गुनासो गरे । उनका अनुसार भारतबाट परीक्षण नगरेरै आइरहेको मिसावटयुक्त दुधले गर्दा एकातिर नेपाली उपभोक्ताको स्वास्थ्यमा प्रतिकूल असर परिरहेको छ भने अर्काेतिर नेपाली किसानको दुध बिक्री हुन नसक्ने अवस्था उत्पन्न भएको छ ।
सङ्घका अनुसार हाल बाँकेमा २२ हजार लिटर दुध खपत हुने अवस्था छ भने सात हजार लिटर अन्य जिल्लामा पठाइने गरिएको छ । तर, जिल्लामा मात्रै २४ हजार लिटर दुध उत्पादन भइरहेको र बर्दियाबाट पनि सात हजार लिटर दुध भित्रिने गरेको छ ।
भारतबाट आउने अवैध र गुणस्तरहीन दुधले बजार असन्तुलित बनाइदिँदा नेपाली किसानको दुध बिक्री हुन नसकेको सङ्घको भनाइ छ । गुणस्तरहीन र भन्सार नगरिएको भारतबाट आउने दुधको मूल्यसँग प्रतिस्पर्धा गर्न नसकिने हुँदा पनि नेपाली किसानको दुध बिक्रीमा समस्या आएको व्यवसायीको भनाइ छ । सोही कारणले सङ्घले बाँकेका प्रमुख जिल्ला अधिकारी विपिन आचार्यलाई ज्ञापनपत्र बुझाएर दुधको अवैध आयात रोक्न र गुणस्तर चेकजाँच तथा भन्सार असुल गरेर मात्रै भित्र्याउन माग गरेको छ ।
बाँकेको जमुनाह नाका लगायत अन्य नाकाहरुबाट पनि साइकल तथा मोटरसाइकलमा धमाधम दुध नेपाल भित्रने गरे पनि कुनै पनि निकायले चेकजाँच नगर्ने गरेको सङ्घको आरोप छ । भेरी दुग्ध उत्पादक सहकारी सङ्घ बाँकेका अध्यक्ष पूर्णप्रसाद अधिकारीले पशु क्वारेन्टाइनले दुधको गुणस्तर जाँच गर्ने प्रविधिको व्यवस्था गरेर परीक्षणपछि मात्रै दुध आयात गर्न दिनुपर्ने माग गरे।
८ भाद्र २०८०, शुक्रबार १५:०६ प्रकाशित
