२१ चैत्र, कोहलपुर । बाँकेमा पहिलो पटक खुल्ला साइक्लिङ प्रतियोगिता हुन लागेको छ । ‘स्वस्थ जीवन, स्वच्छ वातावरण तथा आन्तरिक पर्यटक प्रबर्धन गरौं’ भन्ने मुल नाराका साथ कोहलपुर देउराली साइक्लिङ क्लबको आयोजनामा बाँकेमा पहिलो पटक खुल्ला साइक्लिङ प्रतियोगिता हुन लागेको हो ।

प्रतियोगिता नयाँ वर्षको अवसरमा कोहलपुर चौराहदेखि देउरालीसम्म करिब १ सय ५० भन्दा बढि पुरुष र महिलाको सहभागितामा दुई वटा समूहमा खुल्ला साइक्लिङ प्रतियोगिता आयोजना गर्न लागिएको क्लबका सचिव अमित पाठकले बताए । बाँकेका सबै पालिकाबाट सहभागीता जनाउन सक्ने बताउँदै पाठकले कोहलपुर नगरपालिका-११ कृषि चोक नजिकै रहेको यति साइकल स्टोरमा आफ्नो टिम दर्ता गराउन सकिने जानकारी दिए ।

प्रतियोगितामा प्रथम हुनेलाई १५ हजार, दोस्रो हुनेलाई १० हजार र तेस्रो हुनेलाई ५ हजार पुरस्कार सहित प्रमाण पत्र दिइने सचिव पाठकले बताए ।