२४ भदौ, कोहलपुर । बाँकेको कोहलपुरमा अज्ञात समुहको आक्रमणबाट एकै परिवारका ४ जना घाईते भएका छन । आफ्नै घरमा सुतिरहेको अवस्थामा अज्ञात समुहले आक्रमण गर्दा कोहलपुर नगरपालिका वडा नं. १० मन्नापुरका ललिता चन्द, धनसरा सुनार, धर्मवती बस्नेत र आरुषी चन्द घाईते भएको ईलाका प्रहरी कार्यालय कोहलपुरले जनाएको छ ।
बिहिबार बिहान ४ बजेको समयमा आफ्नै घरमा सुतिरहेको अवस्थामा तीनवटा घरमा अज्ञात समूहले आक्रमण गरेको थियो । ३/४ जनाको सँख्यामा रहेको उक्त समूहको आक्रमणबाट १ जना गम्भीर घाईते भएका छन भने बाँकी ३ जनाको शरिरका विभिन्न भागमा चोट लागेको छ ।
नचिनेका युवाहरुले पहिले आफुहरुलाई इन्जेक्सन लगाएको जस्तो महसुस भएको पिडितहरुले बयान दिएको प्रहरीले जनाएको छ । आक्रमणमा संलग्न समूहले फरक फरक ३ घरमा सुतिरहेका ४ जनामाथि आक्रमण गरेका थिए । आक्रमणमा संलग्न समूहको हालसम्म पहिचान हुन नसकेको प्रहरीले जनाएको छ ।
प्रहरीका अनुसार घर बाहिर सुतिरहेका चन्द परिवारका ४ जना आक्रमण पछि घाइते भएको बताइएपनि अन्य दुईवटा घरमा सो अज्ञात समूहले आक्रमण गरेको थियो । अन्य २ घरका पीडितहरुका सम्बन्धमा जानकारीमा नआएको प्रहरीले जनाएको छ ।
घटनामा संलग्न भएको आशंकामा २ जनालाई नियन्त्रणमा लिएर अनुसन्धान सुरु गरीएको ईलाका प्रहरी कार्यालय कोहलपुरले जनाएको छ ।
२४ भाद्र २०७८, बिहीबार १९:१४ प्रकाशित
