नेपालगञ्ज उपमहानगरपालिकाले ५० शय्याको अक्सिजन सहितको आईसोलेसन वार्ड सञ्चालन गर्ने भएको छ । नगर प्रमुख डा. धवलशम्शेर राणाको अध्यक्षतामा आईतबार बसेको नगर कार्यपालिकाको बैठकले तत्काल अक्सिजन सहितको आईसोलेसन वार्ड सञ्चालन गर्ने निर्णय गरेको हो ।
भेरी अस्पतालमा विरामीको चाँप थेग्न गाह्रो भएपछि उपमहानगरपालिकाले अक्सिजनसहितको वार्ड सञ्चालन गर्ने निर्णय गरेको हो । स्वास्थ्य शाखा प्रमुख रामवहादुर चन्दले उपमहानगरपालिकाको रामलिला मैदान स्थित नारी उत्थान केन्द्रको सभाहलमा कोभिड वार्ड सञ्चालनका लागि आवश्यक तयारी सुरु गरिसकेको जानकारी दिए । १/२ दिन भित्रमै कोभिड वार्ड सञ्चालनमा आउनेछ । उपमहानगरपालिकाले ह्वाईटहाउसमा सञ्चालन गरिरहेको आईसोलेसन केन्द्र समेत नियमित सञ्चालन हुने भएको छ ।
बैठकले नगरप्रमुख डा. धवलशम्शेर राणाको संयोजकत्वमा कोभिड रोकथाम र नियन्त्रणका लागि भईरहेका कामको अनूगमन र व्यवस्थापनका लागि उच्च स्तरीय समिति गठन गरेको छ । समितिमा उपप्रमुख उमा थापा मगर, प्रबक्ता प्रमोद रिजाल, वडा नम्बर २ का वडाध्यक्ष सुनीलसिंह हमाल, वडा नम्बर ३ का वडाध्यक्ष मो. अयुव सिद्धिकी, वडा नम्बर १२ का वडाध्यक्ष बुद्धिसागर सुवेदी, वडा नम्बर १४ का वडाध्यक्ष ओमकारनाथ मिश्रा,वडा नम्बर १८ का वडाध्यक्ष दिपक वर्मा र कार्यपालिका सदस्यहरु इन्दिरा शाही, मञ्जु नेपाली र कौसलकुमार धोवी रहेका छन ।
बैठकले कोभिड उपचारमा तत्काल खर्च गर्ने गरी जिल्ला समन्वय समितिको खातामा ३ लाख ररुपैयाँ सहयोग गर्ने निर्णय गरेको प्रबक्ता रिजालले जानकारी दिए । उपप्रमुख उमा थापा मगरले कोरोना रोकथाम र नियन्त्रणका लागि सबैको साथ र सहयोग अपरिहार्य रहेको बताईन ।
बैठकले भेरी अस्पताल र शिक्षण अस्पतालमा सहयोगका लागि केन्द्र र प्रदेश सरकारको ध्यानाकर्षणसहित अनुरोध गर्ने निर्णय गरेको छ । यसैगरी उपमहानगरपालिकाले थप एउटा एम्बुलेन्स भाडामा सञ्चालन गर्ने निर्णय गरेको वडा नम्बर १८ का अध्यक्ष दिपक वर्माले बताए । बैठकले भेरी अस्पताल र आईसोलेसन केन्द्रमा करारमा कर्मचारी लिई परिचालन गर्ने निर्णय गरेको छ ।
जिल्लाको खजुरा गाउँपालिकाले आजैदेखि ५० बेडको अक्सिजनसहितको आइसोलेसन केन्द्र संचालनमा ल्याएको छ भने, जानकी गाउँपालिकाले केही दिनभित्रै ५० बेडको आइसोलेसन संचालनमा ल्याउँदैछ । त्यसैगरी अन्य पालिकाहरुले पनि तयारी थालेका छन ।