२९ कात्तिक, नेपालगन्ज । सिकलसेल एनिमिया रोगको उपचारका लागि भेरी अस्पताल नेपालगन्जमा बेग्लै वार्डको स्थापना हुने भएको छ ।
वार्डको अभावले गर्दा अस्पतालमा सिकलसेलका बिरामीहरू आउने तर भने जस्तो उपचार गर्न नसकिरहेको अवस्थामा बेग्लै वार्ड स्थापना गर्ने निर्णयले यस क्षेत्रका सिकलसेलका बिरामीलाई निकै राहत मिल्ने भेरी अस्पतालका प्रमुख मेसु डा. नीराजन सुवेदीले बताए ।
उनले थारु समुदायमा देखिने सिकलसेल एनिमिया रोग ठुलो समस्याका रूपमा देखिएकाले सरकारले बेग्लै वार्ड स्थापना गरेर अति नै सराहनीय काम गरेको बताए ।
सिकलसेलका लागि छुट्टै वार्डको माग धेरै पहिलेदेखि हुँदै आएकोमा अहिले आएर पूरा भएको बाकककेका थारु अगुवा राजेन्द्र चौधरीले बताए ।
उनले यसका लागि आफूहरू लगायत अन्य अगुवाहरूले पनि धेरै पहिलेदेखि प्रयास गर्दै आएको बताए ।
भेरी अस्पताल विकास समितिका अध्यक्ष वीरेन्द्रबहादुर शाहले बाँके, बर्दियालगायतका पश्चिम तराईका थारु समुदायहरूमा प्रमुख स्वास्थ्य समस्याको रूपमा सिकलसेल रहेकाले अब उपचारमा सहजता हुने बताए ।
उनले यसको उपचारका लागि छुट्टै वार्ड नहुँदा समस्या रहेकोमा अब नहुने विश्वास व्यक्त गरे ।
स्वास्थ्य तथा जनसङ्ख्या मन्त्री प्रदीप पौडेलले केही दिन अघि मात्र मन्त्रिस्तरीय निर्णय गर्दै थारु समुदायको प्रमुख समस्याको उपचारका लागि बेग्लै वार्ड स्थापना गरेर विशेष उपचारको व्यवस्था गर्ने निर्णय गरेका थिए ।
ठुलो सङ्ख्यामा थारु समुदायमा समस्या देखिए पनि यसको उपचारका लागि पर्याप्त व्यवस्था हुन नसकिरहेको अवस्थामा भेरीमा छुट्टै वार्डको व्यवस्था गर्ने निर्णय पछि सहज हुने चिकित्सक र थारु समुदायका अगुवाहरूको भनाइ छ ।
