एजेन्सी । संसारमा अनेक खालका अनौठा मानिसहरू छन् जसको हर्कतले जो कोहीलाई कहिले हसाउँछ, कहिले त्रसित बनाउँछ त कहिले अचम्मित तुल्याउँछ।

हालै एउटा यस्तै भिडियो भाइरल बनिरहेको छ । जसमा ती व्यक्तिले एउटा इन्स्टाग्राम भिडियोबाटै आफ्नो धनसम्पत्तिको यसरी बखान गरेका छन् कि त्यो देख्दा जोकोही पनि स्तब्ध बन्दछ।

इन्स्टाग्राममा @mr.thank.you नामबाट चर्चित रुसी व्यापारी सर्गेइ कोसेन्कोले आफ्नी गर्लफ्रेन्डसँगको एउटा भिडियो शेयर गरेका छन् । त्यसमा उनले गर्लफ्रेन्डको पाइतालामुनि पैसाका नोटको कार्पेट नै बिछाइदिएका छन् ।

भिडियोको सुरुमै देखिन्छ कि सर्गेइ कोसेन्कोले आफ्नी गर्लफ्रेन्डको हात पक्रिएर एउटा निजी हेलिकप्टरबाट ओर्लिरहेका छन् । हेलिकप्टरबाट झर्ने सिंढीदेखि बाटोमा टाढासम्मै नोटको गड्डीको कार्पेटले बिछ्याइरहेको देखिन्छ। त्यहीँ पैसाको कार्पेटमा ती युवती हिँड्छिन् ।

सो भिडियोको क्याप्सनमा उनले लेखेका छन्, ‘थाहा छ यो रमाइलो कुरा हो कि मलाई पैसाभन्दा धेरै प्रेम तिमीसँग छ ।’

सर्गेइले भिडियोमा सेतो शर्ट र बैजनी रंगको ट्राउजर लगाएका छन् भने उनकी प्रेमिकाले कालो स्कर्ट र ब्लेजर लगाएकी छिन् ।

यो भिडियो केही पुरानो भए पनि यसको चर्चा अझै सेलाएको छैन र भाइरल बनिरहेको सो भिडियोमा मानिसहरुले अनेक खालका टिकाटिप्पणीहरू गरिरहेका छन् । यद्यपि त्यहाँ देखाइएका नोटहरू सक्कली हुन् कि नक्कली भन्ने बारेमा भने पुष्टि हुन सकेको छैन ।