१६ चैत्र २०८०, शुक्रबार
प्रचण्ड सार्बजनिक भएको स्थानमा बन्ने भयो ‘शान्तिपार्क’
  • काँचुली खबर

एक दशक लामो माओवादी ‘जनयुद्ध’ का नेतृत्वकर्ता पुष्पकमल दहाल ‘प्रचण्ड’ पहिलोपटक सार्वजनिक भएको स्थल कास्कीको सिक्लेसमा शान्ति स्तम्भलगायतका पूर्वाधार बन्ने भएका छन्। सशस्त्र संघर्षरत तत्कालीन नेकपा माओवादीका अध्यक्ष प्रचण्डलाई तत्कालीन गृहमन्त्री कृष्णप्रसाद सिटौलाले २०६२ जेठमा मादी गाउँपालिका-१ सिक्लेसबाट हेलिकप्टरमा राखेर काठमाडौं ल्याएका थिए। त्यसयता विकसित शान्ति प्रक्रियाले गति लिँदै देश अहिले संघीय लोकतान्त्रिक गणतन्त्रात्मक मुलुक बनेको छ।

प्रचण्ड पहिलोपटक सार्वजनिक भएको स्थल सिक्लेसको ऐतिहासिक एवं राजनीतिक महत्त्वलाई दृष्टिगत गरी शान्ति स्तम्भसहितका पूर्वाधार निर्माण गर्न लागिएको मादी गाउँपालिका प्रमुख बेदबहादुर गुरुङले जानकारी दिए।

‘सिक्लेस नेपालको शान्ति प्रक्रियाको प्रारम्भ बिन्दु हो,’ उनले भने, ‘नेपालको अक्षांश देशान्तरअनुसार देशकै मध्यबिन्दु पनि यही ठाउँमा पर्ने भएकाले शान्ति स्तम्भसहित हामीले यहाँ मध्यबिन्दु स्तम्भ पनि निर्माण गर्ने तयारी गरेका छौं।’

गाउँपालिकाले आर्थिक वर्ष २०७५/७६ को बजेटमा शान्ति स्तम्भ निर्माणका लागि रु. १० लाख छुट्याइसकेको छ। अध्यक्ष गुरुङका अनुसार गाउँपालिकाले सिक्लेसको भुलुचुदेखि हिमालफेदीको कोरी भन्ने ठाउँसम्म केबलकार सञ्चालन गर्ने योजना अघि सारेको छ। हालै गरिएको अध्ययनको प्रतिवेदनअनुसार लगभग रु. दुई अर्ब ५० करोडको लागतमा उक्त स्थलमा केबुलकार सञ्चालन गर्न सकिने देखिएको छ। कला, संस्कृति र प्रकृतिको बरदान जस्तै देखिने सिम्क्लेस स्वदेशी एवं विदेशी पर्यटकको आकर्षक गन्तव्यका रुपमा विकास भइरहेको सिक्लेस युवा क्लबका पूर्व सचिव देवीजंग गुरुङ बताउँछन्। गुरुङ कला संस्कृतिको जीवन्त अनुभव गर्न पाइने यो गाउँ समुद्री सतहबाट दुई हजार मिटर उचाइमा छ।

लमजुङ हिमालको काखस्थित यो गाउँ आसपास हरियो वन जंगलका कारण वन्यजन्तु एवं चराचरका कारण प्रकृतिप्रेमीहरु लोभिने गर्दछन्। स्थानीय समाजसेवी एवं मादी गाउँपालिका-१ का अध्यक्ष सुरजकुमार गुरुङका अनुसार यो गाउँमा हाल लगभग ४०० घरधुरी रहेका छन्। गुरुङ जातिको कला तथा संस्कृतिको जीवन्त सङ्ग्रहालय जस्तै बनेको यो गाउँबाट गुरुङ जातिको अन्तिम राज्य क्होलासोंथर एक दिनमा पुग्न सकिने भएका कारण पछिल्लो समयमा गुरुङ जातिको अध्ययन तथा अनुसन्धानका लागि समेत स्वदेशी एवं विदेशी अनुसन्धान सिक्लेस पुग्ने गरेका छन्।

गुरुङ संस्कृतिको अध्ययनका लागि सिक्लेस ‘इको म्युजियम’ पनि महत्त्वपूर्ण सहयोगी बनेको छ। सिक्लेसको कला, संस्कृति र प्रकृतिप्रति बढ्दै गएको पर्यटकीय आकर्षण र यहाँ पर्यटकको बसाइलाई लम्ब्याउनले लक्ष्यका साथ गाउँमाथि सिक्लेस पार्कको निर्माण कार्य थालनी गरिएको पार्क निर्माण उपभोक्ता समितिका अध्यक्ष तीलमान गुरुङले जानकारी दिए ।

लगभग ६५ हजार वर्गमिटर क्षेत्रफलमा बन्दै गरेको पार्क निर्माणमा करीब रु. ४० लाख खर्च भइसकेको उनले बताए। पार्कभित्र शौचालयसहित बालबालिकाका लागि खेल्ने विभिन्न संरचना, दृश्यावलोकन स्तम्भसहितका पूर्वाधारहरुको पनि निर्माण कार्य भइरहेको छ। लमजुङ हिमाल, अन्नपूर्ण-२, अन्नपूर्ण-४ का साथै वरिपरिको पहाडी भू-भागको एक साथ दृश्यावलोकन गर्न सकिनु निर्माणाधिन पार्कको विशिष्टता भएको उनको भनाइ छ। सिक्लेसमा पुग्ने पर्यटकका लागि खान-बस्न सहयोग पुर्‍याउने लक्ष्यका साथ १५ वटा घरमा घरवास (होमस्टे) सञ्चालन गरिएको छ भने १२ वटा होटेल छन्। यहाँ दैनिक ४०० जनासम्म पर्यटक राख्नसक्ने क्षमता रहेको छ।

  • १७ भाद्र २०७५, आईतवार १८:१२ प्रकाशित
  • Nabintech