१५ जेठ, डुडुवा । डुडुवा गाउँपालिकाले १८औँ गणतन्त्र दिवस मनाएको छ । डुडुवा कार्यालयमा आज आयोजित विशेष अन्तरक्रिया कार्यक्रमका बक्ताहरुले गणतन्त्र सबै भन्दा राम्रो व्यवस्था भएपनि त्यसको जनताले अझै अनुभुति गर्न नसकेको बताएका छन ।

सहभागीहरुले सम्पुर्ण नेपाली जनताहरुलाई अनुभुति हुने गरी सम्पुर्ण सेवा, पहुँच तथा सहभागिताको प्रभावकारी कार्यान्वयनमा जोड दिएका थिए । कार्यक्रममा डुडुवा गाउँपालिका अध्यक्ष नरेन्द्रकुमार चौधरीले सार्वभौमिकता, स्वाधीनता र राष्ट्रिय एकतालाई सुदृढ गरी देशलाई आर्थिक विकासमा अगाडि बढाउनुपर्ने बताउँदै उनले जनभावनाको कदर गरी संविधानद्वारा निर्दिष्ट दायित्व पूरा गर्नुपर्ने उल्लेख गरे ।

अध्यक्ष चौधरीले सङ्घीय लोकतान्त्रिक गणतन्त्रात्मक शासन व्यवस्थाको माध्यमबाट आर्थिक सामाजिक रूपान्तरणसहित समुन्नत र समृद्ध मुलुक निर्माण गर्न सकिने भन्दै ग्रामिण क्षेत्रका नागरिकहरुलाई गणतन्त्रबारे ज्ञान समेत नभएको अवस्था रहेको बताए ।

कार्यक्रममा डुडुवा गाउँपालिकाका उपाध्यक्ष शाहिदा शाह, वडा अध्यक्षहरु पटेश्वर कुर्मी, दर्गा प्रसाद बर्मा, आमोद तिवारी, सगिर खाँ, प्रमुख प्रशासकिय अधिकृत अशोककुमार पाण्डेय, पत्रकार राकेशकुमार मिश्र लगायतले संङ्गीय तोकतान्त्रिक गणतन्त्रात्मक शासन व्यवस्था बारे चर्चा गर्दै राजनीतिक परिवर्तनले जनताको जीवनस्तरमा गुणात्मक परिवर्तन ल्याउन नसकेकामा चिन्ता व्यक्त गरे ।

कार्यक्रममा पालिकाका जनप्रतिनिधी र कर्मचारीहरुको सहभागिता रहेको थियो । कार्यक्रममा मुलुकमा गौरवमय परिवर्तनका लागि भएका विभिन्न आन्दोलनमा सहादत प्राप्त ज्ञात-अज्ञात सहिदप्रति श्रद्धाञ्जली अर्पण गर्दै लोकतन्त्रका लागि सङ्घर्ष, त्याग र बलिदान गर्ने अग्रजहरूको योगदानको स्मरण गरिएको थियो ।