२२ चैत्र, कोहलपुर । बाँकेको कोहलपुरमा नगर स्तरिय फुटबल प्रतियोगिता सुरु भएको छ । कोहलपुर नगरपालीका वडा नं. ८ स्थित झरकट्टीको खेल मैदानमा शुक्रबारबाट सुरु भएको प्रतियोगिताको वडाध्यक्ष लालबहादुर रानाले उद्घाटन गरेका छन ।

प्रतियोगिताको उद्घाटन गर्दै कार्यक्रमका प्रमुख अतिथि समेत रहेका कोहलपुर नगरपालीका वडा नं. ८ का वडाध्यक्ष रानाले स्थानियस्तरबाट खेलाडी उत्पादन गर्ने उद्धेश्यले प्रतियोगिता आयोजना गरीएको बताए । कोहलपुरका १५ वटै वडाबाट खेलाडिहरुको पहिचान गरि विभिन्न गोल्ड कपहरुमा सहभागिता गराउने गरी छनौट गर्ने उद्धेश्य समेत राखीएको रानाले बताए ।

उनले यस्ता खालका प्रतियोगिता हरेक वडामा संचालन हुनुपर्ने जिकिर समेत गरे । स्थानियस्तरमा लुकेर बसेका प्रतिभालाई उजागर गरी राष्ट्रिय स्तरका खेलाडी उत्पादन गर्न प्रतियोगिता सफल हुनेमा आफु विश्वस्त रहेको बताउँदै वडाध्यक्ष रानाले आगामी दिनमा समेत प्रतियोगिता संचालनमा सहयोगी भुमिका खेल्ने प्रतिवद्धता जनाएका थिए ।

प्रतियोगितामा कोहलपुर नगरपालिकाका १५ वटै वडाबाट प्रतिनिधित्व हुने गरी १५ टिम सहभागी गराईएको कोहलपुर नगर खेलकुद विकास समितिका संयोजक चक्र चिमाला क्षेत्रिले बताए । प्रतियोगिताको विजेताले ७५ हजार नगद, ट्रफी र प्रमाण पत्र पाउनेछन भने उपबिजेताले ३५ हजार नगद सहित ट्रफी प्राप्त गर्नेछन । प्रतियोगितामा विभिन्न विधाका उत्कृष्ट खेलाडिलाई समेत पुरस्कृत गरीने क्षेत्रीले जानकारी दिए ।

कोहलपुर नगर खेलकुद विकास समितिको आयोजनामा संचालन भएको प्रतियोगिताको समापन यहि चैत्र ३० गते हुने आयोजकले जनाएको छ ।