२० चैत्र, कोहलपुर । नेकपा माओवादी केन्द्रका अध्यक्ष पुष्पकमल दाहाल प्रचण्डले महिलाले बन्दुक उठाएकैले नेपालबाट राजतन्त्रको अन्त्य भएर गणतन्त्र स्थापना भएको बताएका छन् ।

बाँकेको कोहलपुरमा आयोजित अखिल नेपाल महिला संघ क्रान्तिकारीको लुम्बिनी प्रदेशको दोस्रो सम्मेलन उद्घाटन गर्दै प्रचण्डले नेपाली महिलाले वीरताको उच्च गाथा कोरेको बताए ।

‘माओवादीको जनमुक्ति सेनामा ४०-४५ प्रतिशतसम्म महिला थिए । जहाँ महिलाले कमान्ड गरेको कुनै पनि मोर्चा हामीले हारेनौं । यो सबैका निम्ति उत्साहको गर्वको कुरा हो,’ प्रचण्डले भने, ‘हामीले युद्धमा सहजै जित हासिल गरेका थिएनौं, त्यसको पछाडि लडाईंको मोर्चामा जाने महिलाले जगाएको उत्साह थियो, वीरता थियो । त्यही वीरताले यो देशबाट राजतन्त्रको अन्त्य गरेर गणतन्त्रको स्थापना गरेको हो । देशमा ३३ प्रतिशत महिला सहभागिता सुनिश्चित गर्दै समावेशी समानुपातिक प्रतिनिधित्व सुनिश्चित भएको हो ।

राज्यबाट वर्षौंसम्म हेपिएका र दबाइएका महिलाले हातमा बन्दुक बोकेपछि नेपाली इतिहास बदलिएको उनको भनाइ छ । ‘नेपालका श्रमजीवी महिलालाई राज्यले सधैं हेप्यो, दबायो । ती हेपिएका, दबाइएका महिला जब बन्दुक हातमा लिएर अगाडि बढे उनीहरूले इतिहास बदल्न सक्ने रहेछन्, राजा-महाराजालाई खेद्न सक्ने रहेछन भन्ने पुष्टि भयो,’ माओवादी अध्यक्ष प्रचण्डले भने ।

जनयुद्धको बेलामा महिलाको सहभागिता बढाउन सकिएन भने क्रान्ति सफल हुन सक्दैन भन्ने विश्वइतिहास, मार्क्सवाद, लेनिनवाद र माओवादले सिकाएको कुरा तत्कालीन नेकपा माओवादीले लागू गरेको प्रचण्डले बताए ।

जनयुद्धमा नेपाली महिलाको योगदान विश्वक्रान्तिकै लागि उदाहरण बनेको भन्दै उनले थपे, ‘जनयुद्ध अगाडि बढ्दै जाँदा महिलाले वीरताका उच्च गाथा कोरे । नेपाल विश्वक्रान्तिको इतिहासमा उदाहरण बन्यो । नेपालका दलित महिलाले अब प्रहरी चौकी कब्जा गरेर पार्टीलाई हतियार बुझाउने काम गरे, त्यसले समग्र क्रान्तिमा ऊर्जा भर्ने काम भयो ।’