२० चैत्र, काेहलपुर । नेकपा माओवादी केन्द्रका अध्यक्ष प्रचण्ड सहितको पदाधिकारी टिम बुधवार बाँके आउने भएको छ । अखिल नेपाल महिला सङ्घ क्रान्तिकारी लुम्बिनी प्रदेश समितिको दोस्रो अधिवेशन उद्‌घाटन कार्यक्रममा सहभागी हुन प्रचण्ड सहित बरिष्ठ उपाध्यक्ष नारायणकाजी श्रेष्ठ, उपाध्यक्ष पम्फा भुसाल, अग्नि सापकोटा, उपमहासचिव वर्षमान पुन, जर्नादन शर्मा, मातृका यादव सहितको टोली बाँके आउन लागेको माओवादी केन्द्र बाँके जिल्ला इन्चार्ज पूर्णा कुमारी सुबेदीले जानकारी दिइन ।

बुधवार दिउसो कोहलपुरको १३ बिगाहा मैदानमा हुने उक्त कार्यक्रमलाई प्रचण्ड लगायतका नेताहरूले सम्बोधन गर्ने कार्यक्रम छ । बाँके आएका नेताहरूले सहिद तथा बेपत्ता परिवारसँग समेत अन्तरक्रिया गर्ने माओवादी बाँकेका जिल्ला संयोजक नरेन्द्र पाण्डेले जानकारी दिए ।

बिहीवार नेपालगञ्जमा नागरिक संवाद कार्यक्रम समेत गरिने संयोजक पाण्डेले बताए ।

यसैबिच माओवादि केन्द्रले बाँकेबाटै अभियानलाई पुन: निरन्तरता दिने भएकाे छ । पुर्वबाट सुरू भएकाे अभियान केही समयलाई राेकिएकाे थियाे । जनतासँग जाेडिने भन्दै माओवादिले चलाएकाे तराई-मधेष केन्द्रित अभियान बाँकेबाट सुरू गर्न लागिएकाे हाे ।

दोस्रो प्रदेश सम्मेलनको तयारी पुरा

बुधवार देखी कोहलपुरमा सुरु हुने अखिल नेपाल महिला सङ्घ क्रान्तिकारीको दोस्रो प्रदेश सम्मेलनको तयारी पुरा भएको छ । मङ्गलवार कोहलपुरमा पत्रकार भेटघाटको आयोजना गरि सम्मेलनको तयारी पुरा भएको जनाएको हो ।

अखिल नेपाल महिला सङ्घ क्रान्तिकारीको प्रदेश इन्चार्ज दामा शर्माले तयारी पुरा गरिएको जनाएकी हुन ।

सम्मेलनमा ६ सय ६० बढि प्रतिनिधि सहभागी हुने र यसले नयाँ नेतृत्व समेत चयन गर्ने अखिल नेपाल महिला सङ्घ क्रान्तिकारी लुम्बिनी प्रदेश अध्यक्ष उषा पुनले बताइन ।