७ माघ, कोहलपुर । नेपाली राष्ट्रिय क्रिकेट टिमका कप्तान रोहित कुमार पौडेललाई कोहलपुरमा भब्य स्वागत तथा सम्मान गरीएको छ । सोमबार कोहलपुरस्थित क्रिकेट मैदानको अवलोकनकालागी पुगेका कप्तान पौडेललाई यहाँका जनप्रतिनिधि तथा खेलप्रेमीहरुले स्वागत तथा सम्मान गरेका हुन ।

कोहलपुर नगरपालिका उपप्रमुख संगिता सुवेदी, प्रमुख प्रशासकिय अधिकृत मान बहादुर गिरी र सामाजिक विकास समितिका संयोजक ईश्वरी विश्वकर्माले पौडेललाई सम्मान गरेका छन ।

कप्तान पौडेललाई स्वागत गर्दै राष्ट्रिय क्रिकेट टिमका पूर्व कप्तान तथा राष्ट्रिय टिम छनौट समितिका संयोजक एलवी क्षेत्रीले प्रस्तावित अन्तराष्ट्रिय क्रिकेट मैदानलाई राष्ट्रिय स्तरमा स्थापित गर्न सबैको सहयोग आवश्यक रहेको बताए ।

यस्तै कोहलपुर नगरपालिका उपप्रमुख संगिता सुवेदीले प्रस्तावित अन्तराष्ट्रिय क्रिकेट मैदानलाई लुम्बिनीको पहिचानका रुपमा यसको प्रवद्र्धन र स्तरउन्नति गराउन खेलाडीहरुको महत्वपूर्ण भूमिका रहने बताईन ।

कोहलपुर नगरपालिकाले हरेक वर्ष उपमेयर कप क्रिकेट प्रतियोगिता गराउँदै आएको जानकारी दिँदै उनले प्रस्तावित अन्तराष्ट्रिय क्रिकेट मैदानकालागि समेत नगरपालिकाबाट बजेट विनियोजन गरीने बताईन । कोहलपुर नगरपालिकाले शिक्षा र खेलकुदका क्षेत्रमा ठुलो लगानी गरीरहेको उनको भनाई थियो ।

कोहलपुर नगरपालिका सामाजिक विकास समिति संयोजक ईश्वरीप्रसाद विश्वकर्माको सभापतित्वमा भएको कार्यक्रममा बोल्दै कप्तान पौडेलले सम्मानले थप उर्जा प्राप्त भएको बताएका थिए । उनले स्थानियस्तरबाटै खेलाडी उत्पादनकालागी राज्यले लगानी गर्नुपर्ने धारणा राखेका थिए ।

पौडेलले ८ फेब्रुअरी २०१८ मा भएको आईसीसी विश्व क्रिकेट लिग डिभिजन टू प्रतियोगितामा नेपालका लागि लिस्ट ए बाट क्रिकेटमा डेब्यू गरेका थिए । प्रतावित अन्तर्राष्ट्रिय क्रिकेट मैदानमा उनको यो पहिलो स्थलगत अवलोकन हो ।