१४ मंसिर, नेपालगन्ज । नेपालगन्ज रंगहालामा अब खेलाडीले खेल्न र प्रशिक्षण गर्न पाउने भएका छन् । भौतिक पूर्वाधार निर्माणकालागी भन्दै राष्ट्रिय खेलकुद परिषद् (राखेप) ले करिब ६ वर्ष देखि नेपालगन्जमा रङ्गशालामा खेलाडीहरूलाई प्रशिक्षणमा रोक लगाएको थियो । राखेपले सचिवस्तरीय निर्णय गरी प्रशिक्षण कार्यक्रम सञ्चालन गर्न दिने निर्णय गरेको हो ।
खेलाडीहरूले नेपालगन्ज रङ्गशालामा प्रशिक्षण र खेल्न नपाएपछि त्यसको विरोध हुँदै आएको थियो । बाँके जिल्ला फुटबल सङ्घले फुटबलका गतिविधि आयोजना गर्न नपाएको भन्दै विरोधका कार्यक्रम समेत गरेको थियो ।
गत कात्तिक २६ गते सचिवस्तरीय निर्णय गरी अहिलेसम्म लगाउँदै आएको प्रतिबन्ध हटाइएको हो । तर यसको जानकारी मध्य पश्चिमाञ्चल क्षेत्रीय खेलकुद विकास समिति लुम्बिनी प्रदेशलाई मङ्सिर ११ गते मात्र प्राप्त भएको छ ।
खेलकुद परिषद्ले रङ्गशालामा सेन्थेटिक ट्र्याक निर्माणमा देखिएका गल्तीहरूलाई समेत यथाशक्य चाँडो सच्याउन भनेको छ । उत्तरतर्फको डी एरियामा पानी जम्ने र लेभल समेत नमिलेको भन्दै पञ्चकन्यार साइनोकोट्स जेभी ललितपुरलाई लिखित रूपमै पत्राचार गरेको छ ।
वर्षौ पछि खेलाडीले नेपालगन्ज रङ्गशाला प्रयोग गर्न पाउनु खुसी कुरा भएको बाँके जिल्ला फुटबल सङ्घका अध्यक्ष एवम् अखिल नेपाल फुटबल सङ्घका केन्द्रीय सदस्य भोजराज शाहीले बताए । उनले भने,‘भौतिक पूर्वाधार निर्माण नाममा नेपालगन्ज रङ्गशालामा खेलाडीले खेल्न पाएका थिएनन् । राज्यले अर्बौँ रुपैयाँ लगानी गरेर निर्माण गरेको संरचना कर्मचारीको लापरबाहीले प्रयोगविहीन भएको थियो । राखेपले अहिले गरेको निर्णय स्वागत योग्य छ । यसका लागि हामी राखेपलाई विशेष धन्यवाद दिन चाहन्छौँ ।’
नेपालगन्ज रङ्गशालामा २०७६ सालमा आठौँ राष्ट्रिय खेलकुद प्रतियोगिता सम्पन्न भएको थियो । राष्ट्रिय खेलकुद प्रतियोगिता आयोजना गर्न एक वर्ष अघि देखि नै नेपालगन्ज रङ्गशालाको भौतिक पूर्वाधार निर्माण गर्ने भनेर खेलाडीलाई खेल्नबाट वञ्चित गरिएको थियो ।
पछिल्लो समय नेपालगन्ज रङ्गशालामा एथलेटिक्सको सिन्थेटिक ट्र्याक निर्माणको काम भएका कारण मैदानमा खेलाडीले खेल्न पाएका थिएनन् । ट्र्याक निर्माण भएर पनि सरकारलाई हस्तान्तरण गर्न अघि नै बिग्रिएपछि रङ्गशालामा राष्ट्रिय खेलकुद परिषद्ले कसैलाई पनि खेल्न अनुमति दिएको थिएन ।
१४ मंसिर २०८१, शुक्रबार १०:५४ प्रकाशित
