२६ कात्तिक, कोहलपुर । नेपाल सरकारको एक पालिका एक हुलाक नीतिअनुसार बाँकेको आठ वटै पालिकामा हुलाक कार्यालय स्थापना भएको छ ।
सोक्रममा पछिल्लो पटक आइतबार जिल्लाको डुडुवाको कम्दी, नरैनापुरको नरैनापुर, राप्तीसोनारीको अगैया र बैजनाथको बनकटुवामा हुलाक कार्यालय स्थापना गरिएको जिल्ला हुलाक कार्यालय बाँकेका प्रमुख गोविन्दप्रसाद पाण्डेले बताए ।
उनले जानकीको मानपुर र खजुराको खजुरामा यसअघि नै हुलाक कार्यालय स्थापना भइसकेको बताए । कोहलपुरमा इलाका हुलाक कार्यालय छ भने नेपालगन्जमा जिल्ला हुलाक कार्यालय रहेको छ । पालिकास्तरीय हुलाक कार्यालयमा खरिदारको कमान्डमा कर्मचारी परिचालन गरिएको प्रमुख पाण्डेले बताए ।
विगतमा इलाका र अतिरिक्त कार्यालयका रूपमा रहेका हुलाक कार्यालयलाई अब स्थानीय तह अन्तर्गत सञ्चालन गरिएको उनले बताए । बाँकेमा ११ इलाका र ३५ अतिरिक्त हुलाक कार्यालय रहेका थिए ।
बाँके जिल्ला हुलाक कार्यालयले लुम्बिनी प्रदेशका बर्दिया तथा कर्णाली प्रदेशका सबै जिल्लाको हुलाक स्टेशनरी र डाँक व्यवस्थापन गर्दै आएको छ । रेडियो नवीकरण, सूचना विभागबाट प्रवाह हुने सेवा पनि हुलाक कार्यालयबाट प्रदान हुँदै आएको पाण्डेले बताए ।
एफ।एम। रेडियो तथा केवलको नवीकरण तथा अनुगमन, पत्रपत्रिकाको लोक कल्याणकारी विज्ञापनको भुक्तानी, प्रेसपास नवीकरण लगायतका सेवा प्रवाह पनि सोही कार्यालयबाट भइरहेको छ ।
हुलाक चिठीपत्र लगायत दस्ताबेज सम्बन्धित व्यक्ति वा संस्थासम्म पुगाउने विश्वसनीय माध्यम भएकाले सूचना प्रविधिको वर्तमान युगमा पनि यसको महत्त्व कायमै रहेको हुलाकका कर्मचारीहरूको भनाइ छ ।
२६ कार्तिक २०८१, सोमबार १४:३५ प्रकाशित
