१७ असोज, दाङ । दाङमा जुवाको खालबाट सात जना पक्राउ परेका छन् । दाङ प्रहरीकाअनुसार पक्राउ पर्नेमा रुकुम पूर्वको भूमे गाउँपालिका-३ घर भई घोराही उपमहानगरपालिका-१४ मा होटल सञ्चालन गरी बस्ने ४० वर्षीय बोधधन रोका, रुकुम पूर्व पुथा उत्तरगङ्गा-११ घर भई घोराही-१५ बस्ने ४१ वर्षका रामचन्द्र बुढा, ५६ वर्षका विष्णु बुढा, ५७ वर्षका ज्योती बुढा रहेका छन् ।

यस्तै घोराही-१५ का ४३ वर्षीय अम्मर घर्ती, पुथा उत्तरगङ्गा-११ घर भई घोराही-१४ बस्ने ५६ वर्षीय सुकलाल बुढा र घोराही-१३ बस्ने ४१ वर्षीय दीपक विक पनि पक्राउ परेका जिल्ला प्रहरी कार्यालय दाङका प्रहरी नायब उपरीक्षक ईश्वर थापाले जानकारी दिए ।

उनीहरूको साथबाट ५८ हजार चार सय ५५ रुपैयाँ र तीन गड्डी तास बरामद गरिएको प्रहरीले जनाएको छ । घोराही-१४ मा रहेको कुमारी होटलमा जुवा खेलिरहेको अवस्थामा प्रहरीले उनीहरूलाई पक्राउ गरेको हो ।