१४ असार, कोहलपुर । जिल्ला प्रहरी कार्यालय बाँकेले महिलाको हत्या गरी फरार भएका एक अभियुक्तलाई पक्राउ गरेको जनाएको छ । गत वैशाख २९ गते बाँकेको नेपालगंज-९ श्रद्धानगरमा कोठा भाडामा लिई बस्दै आएकी एक महिलाको हत्या भएको थियो ।

बाँके कोहलपुर-६ घर भएकी २२ वर्षिया सुमदरानी थारुलाई घाँटी रेटी कर्तब्य गरी फरार रहेका बर्दिया राजापुर-८ बस्ने २६ वर्षिय शैलेन्द्र चौधरीलाई पक्राउ गरीएको प्रहरीले जनाएको छ ।

जिल्ला प्रहरी कार्यालय बाँकेका प्रहरी निरीक्षक सुजन शाहको कमाण्डमा खटिएको प्रहरी टोलिले बाँकेको जानकी गाँउपालिका १ पचपोखरास्थित नेपाल-भारत सिमा क्षेत्रबाट शुक्रबार चौधरीलाई पक्राउ गरेको हो ।

पक्राउ परेका चौधरीलाई बाँके जिल्ला अदालतमा उपस्थित गराई ५ दिनको म्याद थप गरी अनुसन्धान एवं कारवाही प्रक्रिया अगाडी बढाईएको जिल्ला प्रहरी कार्यालय बाँकेका सूचना अधिकारी एवं प्रवक्ता प्रहरी नायव उपरीक्षक नारायण डाँगीले जानकारी दिएका छन् ।