एजेन्सी । अन्तर्राष्ट्रिय पप आइकन जस्टिन बिबर ३० वर्ष पुगेका छन् । जस्टिन गीत ‘बेबी’ बाट चर्चाको शिखरमा पुगेका थिए ।

२० वर्षको उमेरमा ग्रामी अवार्ड जितेका उनले ३९ वटा विश्व कीर्तिमान बनाएका छन् । तर, उनको बाल्यकाल र व्यक्तिगत जीवन भने निकै पीडादायी थियो ।

उनकी आमा लागु औषध दुर्व्यसनी थिइन्, जसले डिप्रेसनका कारण आत्महत्या गर्न ट्रकको अगाडि हाम फालेकी थिइन् । उनको ज्यान जोगियो, तर उनलाई मानसिक अस्पतालमा राखियो। त्यहाँ छाडेपछि उनले १८ वर्षको उमेरमा जस्टिनलाई जन्म दिइन् ।

जस्टिन बिबरकी आमा प्याटी मेलेट ३ वर्षकी थिइन् जब उनी पहिलो पटक यौन दुर्व्यवहारको शिकार भएकी थिइन् । उनी १४ वर्षको हुँदासम्म धेरै पटक शारीरिक दुर्व्यवहारको शिकार बनिन् । १५ वर्षकी थिइन् जब उनी बलात्कारको शिकार भइन् । यही कारण उनी सानैदेखि लागुऔषधको लतमा फसेकी थिइन् ।

लगातार लागुऔषध सेवनका कारण उनको मानसिक अवस्था बिग्रन थाल्यो र एक दिन उनले विद्यालयको बाथरुममा आगो लगाइन् । स्कुलबाट निष्कासित भएपछि, प्याटीले सिकर्मी जेरेमी बिबरलाई भेटे।

प्याटी केवल १७ वर्षकी थिइन् जब उनी आत्महत्या गर्ने मनसायले ट्रकको अगाडि उभिइन् । उनको ज्यान जोगियो तर मानसिक अवस्थाका कारण उनलाई मानसिक शरणमा राखिएको थियो । मानसिक आश्रय छोडेपछि उनले इसाई धर्म परिवर्तन गरिन् र प्रेमी जेरेमी बिबरसँग बस्न थालिन्। केही महिनापछि, प्याटीले मार्च १, १९९४ मा जस्टिन बिबरलाई जन्म दिइन्। उनको जन्म ओन्टारियोको सेन्ट जोसेफ अस्पतालमा भएको थियो।

सेन्टफोर्ड स्कूलमा पढ्दा जस्टिनलाई संगीतमा रुचि सुरु भयो । उनले आफैँ पियानो, ड्रम, गिटार र ट्रम्पेट बजाउन सिके। १२ वर्षको उमेरदेखि जस्टिनले विद्यालयमा हुने सांस्कृतिक कार्यक्रममा प्रस्तुति दिन थालेका थिए । सन् २००६ बाट जस्टिन युट्युबमा आफ्नो भिडियोहरू अपलोड गर्न थाले। उत्कृष्ट गीतका कारण उनलाई युट्युबमा मन पराउन थालियो ।

सन् २००७ मा रेकर्डिङ स्टुडियोका कार्यकारी स्कूटर ब्राउन नयाँ गायक खोज्दै थिए। यसै क्रममा उनको नजर जस्टिनले अपलोड गरेको भिडियोमा पर्‍यो । भिडियो हेरेपछि उनलाई गीत यति मन पर्‍यो कि उनले जस्टिनको खोजी गर्न थाले ।

उनले थिएटरमार्फत जस्टिनको विद्यालयको ठेगाना पाए । जब ब्राउनले स्कुलबाट प्राप्त गरेको ठेगाना प्रयोग गरेर जस्टिनकी आमालाई सम्पर्क गरे, ब्राउन यहूदी भएको भन्दै उनले प्रस्ताव सिधै अस्वीकार गरिन्।

तर ब्राउनले हार खाएनन् । उनले चर्चका मानिसहरूलाई सम्पर्क गरे । उनीहरूको सम्झाएपछि बल्ल प्याटी सहमत भइन् र १३ वर्षीय जस्टिनलाई ब्राउनसँग एटलान्टा पठाइन् । जस्टिनले एट्लान्टामा सुरुमा केही डेमो टेपहरू रेकर्ड गरे र एक हप्तापछि रेकर्ड सुरु गर्न थाले।

जस्टिनको पहिलो एकल गीत ‘वन टाइम’ जुलाई २००९ मा एल्बमको रेकर्डिङको क्रममा रेडियोमा रिलिज गरिएको थियो । गीत क्यानेडियन शीर्ष १०० मा १२ नम्बर र बिलबोर्ड हट १०० मा १७ नम्बरमा पुग्यो।

जस्टिनको बढ्दो लोकप्रियता देखेपछि स्कुटर ब्राउन उनको प्रबन्धक बने । पहिलो गीतबाट लोकप्रियता कमाएपछि जस्टिनको ‘माई वर्ल्ड’ एल्बम आयो । साथै उनका एकल गीत ‘वन लेस लोन्ली गर्ल’, ‘लभ मी’ र ‘फेवरिट गर्ल’ पनि रिलिज भए । यी सबै गीतहरू बिलबोर्ड हट १०० मा शीर्ष ४० रहे । बिलबोर्ड हट १०० को शीर्ष ४० मा एकै साथ चार गीतहरू पुग्ने जस्टिन संसारको सबैभन्दा कान्छो कलाकार बने ।

चर्चा बढेसँगै जस्टिनले सन् २००९ मा क्रिसमसको अवसरमा तत्कालीन अमेरिकी राष्ट्रपति बाराक ओबामा र उनकी पत्नी मिशेल ओबामाका लागि ह्वाइट हाउसमा प्रस्तुति दिने अवसर पाएका थिए ।

पहिलो एल्बमले इतिहास रच्यो

जस्टिन बिबरको पहिलो एल्बम माई वर्ल्ड जनवरी २०१० मा रिलीज भएको थियो जसको गीत ‘बेबी’ अन्तर्राष्ट्रिय हिट भएको थियो। यो युट्युबमा सबैभन्दा धेरै हेरिएको गीत बन्यो ।

जस्टिनले बेबी गीतको लागि ग्रामीमा नामांकन समेत प्राप्त गरे। यो गीतले सबैभन्दा लोकप्रिय अनलाइन भिडियोको रूपमा विश्व रेकर्ड पनि राखेको छ। उनको बढ्दो लोकप्रियताको बिचमा जस्टिनलाई क्यानडाका तत्कालीन प्रधानमन्त्री स्टीफन हार्परले २०१२ मा रानी एलिजाबेथ-द्वितीय डायमंड जुबली पदक प्रदान गरे।

पहिलो एल्बमबाट नै जस्टिन बिबरलाई पप किङ र पप आइडल भनिन थाल्यो। यसबाहेक उनका एल्बम ‘अण्डर द मिस्लटो’, ‘बिलिभ’, ‘पर्पज’, ‘चेन्ज’ लगातार हिट भए र जस्टिनको लोकप्रियता पनि बढ्दै गयो।

प्रेम जीवन

जस्टिन बिबरकी पहिलो प्रेमिका केटलिन बिडल थिइन्, यद्यपि उनीहरूको सन् २००९ मा ब्रेकअप भयो । जस्टिन गायिका तथा अभिनेत्री सेलेना गोमेजलाई सधैँ मन पराउने गर्दथे । जब उनीहरूको प्रबन्धकलाई यो कुरा थाहा भयो तब उनले सन् २०१० मा दुबैलाई भेट्ने व्यवस्था गराए । भेटघाटपछि दुवैको एकअर्कासँग सम्बन्ध गाँसियो ।

जब तिनीहरूको सम्बन्धको अफवाहहरू बढ्न थाले, सेलेना गोमेजले एलेन शोमा जस्टिन उनको कान्छो भाइ जस्तै भएको बताएकी थिइन् । तर यसले उनीहरूको सम्बन्धमा कुनै असर परेन । यद्यपि २ वर्षपछि दुवैले ब्रेकअपको घोषणा गरेका थिए ।

सन् २०१६ मा सेलेना चर्चित गायक चार्ली पुथसँग डेट गरिरहेकी थिइन् भन्ने खबर आएको थियो । धेरै उतारचढावपछि सन् २०१८ मा दुवैको ब्रेकअप भयो । चर्चित गीतहरू ‘सरी’, ‘मार्क माई वर्ड’ र ‘ह्वाट डु यू मीन’ जस्टिनले सेलेनाका लागि लेखेका थिए।

सेलेना गोमेजसँग अलग भएपछि, जस्टिनले जुलाई ७, २०१८ मा मोडल हेली बाल्डविनसँग इन्गेजमेन्ट गरे। नोभेम्बर २०१८ मा विवाह गरेपछि दुवैले सन् २०१९ मा साउथ क्यालिफोर्नियामा विवाह समारोहको आयोजना गरेका थिए । जस्टिनको पहिलो प्रेमिका केटलिन बिडल पनि यस समारोहमा सहभागी भएकी थिइन्।

दुर्लभ रोग

सन् २०२० मा जस्टिनले सामाजिक सञ्जालमार्फत आफूलाई लाइम रोग भएको बताएका थिए । फेब्रुअरी २०२२ मा जस्टिनले आफूलाई रेमसे हन्ट सिन्ड्रोम भएको खुलासा गरे। जसका कारण उनको आधा अनुहारमा पक्षाघात भएको थियो । भिडियोमा उनले आफू आँखा झिम्काउन पनि नसक्ने बताएका थिए । बिमारीका कारण जस्टिनले धेरै कन्सर्ट रद्द गर्नु परेको थियो ।