२७ माघ, काेहलपुर । बाँकेकाे काेहलपुरमा राष्ट्रिय स्तरकाे महिला क्रिकेट प्रतियाेगीता सुरू भएकाे छ । शनिबारदेखि सुरू भएकाे “सुशील कोइराला मेमोरियल यू-१९ महिला राष्ट्रिय टि-२० क्रिकेट प्रतियोगिता”लाई नेपाल क्रिकेट संघ (क्यान)को वार्षिक क्यालेन्डरमा राखेर संस्करणका रुपमा अगाडि बढाईने बताईएकाे छ ।
कोहलपुर नगरपालिकाको आयोजना, कोहलपुर नगर खेलकुद विकास समितिको व्यवस्थापन र क्यानको सहकार्य र प्राविधिक सहयोगमा आजदेखि कोहलपुरस्थित प्रस्तावित अन्तराष्ट्रिय क्रिकेट मैदानमा सुरु भएको प्रतियोगिताको उद्घाटन समारोहमा सहभागी क्यानका पदाधिकारीले “सुशील कोइराला मेमोरियल यु-१९ महिला राष्ट्रिय टि-२० क्रिकेट प्रतियोगिता”लाई अर्को वर्षदेखि क्यानको वार्षिक क्यालेन्डरमै राख्ने प्रतिबद्धता जनाएका छन ।
क्यानका केन्द्रीय कोषाध्यक्ष पदम बहादुर खड्काले यो प्रतियोगितालाई क्यानको क्यालेन्डरमा राखेर प्रस्तावित अन्तराष्ट्रिय क्रिकेट मैदानमा राष्ट्रियस्तरका प्रतियोगिताहरु संचालन गरिने प्रतिबद्धता जनाए । ‘महिला राष्ट्रिय टि २० क्रिकेट च्याम्पिनसीप प्रतियोगिता आयोजना गरेर ओझेलमा पर्न थालेको अन्तराष्ट्रिय क्रिकेट मैदानलाई चर्चामा ल्याउने प्रयास अत्यन्तै सकारात्मक छ’ उनले भने, ‘यसको पहिचान जोगाइ राख्न खेल गतिविधिसँगै भौतिक संरचनाहरुले पनि पूर्णता पाउन जरुरी । यसमा राज्यको ध्यान जावस् ।’
लुम्विनी, कर्णाली र सुदूरपश्चिमको प्रमुख हवको रुपमा रहेको कोहलपुर क्रिकेट मैदान यहाँको पहिचान भएको पनि उनले बताए ।
संविधान सभा सदस्य तथा पूर्व मन्त्री अमर सिंह पुनले खेल मैदानमात्र भएर नहुने भन्दै राष्ट्रियस्तरका प्रतियोगिता कोहलपुर क्रिकेट मैदानमा हुनु आवश्यक रहेको बताए । उनले भने, ‘पालिका आफ्नै पहलमा राष्ट्रियस्तरको प्रतियोगिता गर्नु आफैमा चुनौतिपूर्ण हो । कोहलपुर नगरपालिकाले खेलकुदको क्षेत्रमा गरेको लगानी अत्यन्तै स्रहानीय छ । यसले क्रिकेट मैदानको उपयोगिताको समेत पुष्टि गरेको छ ।’
कोहलपुर नगरपालिकाका नगर प्रमुख पूर्ण प्रसाद आचार्यले क्यानको महत्वपूर्ण सहयोगका कारण राष्ट्रिय स्तरको महिला क्रिकेट प्रतियोगिता आयोजना गर्न सफल भएको बताए । उनले क्यानको वार्षिक क्यालेन्डरमा समावेश गरेर यस्ता प्रतियोगिताहरुलाई संस्करणका रुपमा अगाडि बढाउने योजनामा आफु रहेको सुनाए ।
‘पछिल्लो समय युवा पुस्तामाझ लोकप्रिय फुटवल तथा क्रिकेट जस्ता खेलकुद गतिविधिलाई पालिकाले कोहलपुरको पहिचानका रुपमा अगाडि बढाउन चाहेको छ’ उनले भने, ‘यस्ता प्रतियोगिताले नयाँ खेलाडी उत्पादनमा ठूलो भूमिका निर्वाह गर्छ भन्ने हाम्रो विश्वास छ ।’
यस्तै कोहलपुर नगरपालिकाका नगर उपप्रमुख संगिता सुवेदीले बाँके क्रिकेटरको उर्वरभूमि भएपनि पछिल्लो समय भने नयाँ खेलाडी उत्पादन नहुँदा खेलाडीहरुको अभाव सिर्जना भएको बताइन् । उनले नयाँ खेलाडी उत्पादनकै लागि पालिकाले यस्ता प्रतियोगितालाई प्राथमिकता दिएको बताइन् ।
कार्यक्रमका सभाध्यक्ष आचार्यले बलिङ र कार्यक्रमका प्रमुख अतिथि एवं संविधान सभा सदस्य पुनले ब्याटिङ गरेर प्रतियोगिताको उद्घाटन गरेका थिए ।
उद्घाटन कार्यक्रममा नेपाल भलिवल संघका केन्द्रीय सचिव मंगल श्रेष्ठ, क्यानका लुम्विनी प्रदेश सदस्य दुर्गा थापा, क्रिकेट संघ बाँकेका अध्यक्ष सरोवर प्रसाई, पत्रकार महासंघ बाँकेमा उपाध्यक्ष संगिन शर्मा, नेपाली काँग्रेस बाँकेका सभापति नारायण प्रसाद गौडेल, इलाका प्रहरी कार्यालय कोहलपुरका डिएसपी सुन्दर तिवारी लगायतको उपस्थिति रहेको थियो ।
