जेठ २५, बुटवल । लुम्बिनी प्रदेश सरकारले बुटवललाई आर्थिक र कपिलवस्तुलाई सांस्कृतिक राजधानीको रूपमा विकास गर्ने नीति ल्याएको छ । बुधबार लुम्बिनी प्रदेशसभामा प्रदेश प्रमुख अमिन शेरचनले लुम्बिनी प्रदेश सरकारको नीति तथा कार्यक्रम प्रस्तुत गर्दै प्रदेशको स्थायी राजधानी व्यवस्थापनलाई पनि गौरवको आयोजनाभित्र राखिएको बताए ।
स्थायी राजधानी तोकिएको स्थान दाङको राप्ती उपत्यका देउखुरीलाई प्रदेश सरकारले गौरवको आयोजना घोषणासँगै लुम्बिनी प्रादेशिक अस्पताल, रापती अस्पताललाई गौरवको आयोजनामा राखेको छ । नीति तथा कार्यक्रममा ‘राष्ट्रको गौरव र प्रदेशको पहिचान झल्कने गरी गुरुयोजनाको आधारमा प्रदेश राजधानीको लागि पूर्वाधार निर्माण जग्गा व्यवस्थापन, ल्याण्ड पुलिङ्ग र अन्य संरचना निर्माण गर्ने कार्य अघि बढाइने शेरचनले उल्लेख गरेका छन् ।
प्रदेशको राजधानी व्यवस्थापनबाहेक लुम्बिनी प्राविधिक विश्वविद्यालय, पाल्पाको रामपुरदेखि रोल्पाको पातेहल्ना, जिन वाङ, रामपुर कपरकोट जीवराज आश्रित सडक, कृष्ण सेन इच्छुक मार्गलाई प्रादेशिक गौरवको आयोजनाको रूपमा विकास गरी कार्यान्वयन गरिने उल्लेख छ । यस्तै अर्घाखाँची र प्युठानको सिमनामा पर्ने नौमुरे बहुउद्देश्यीय जलाशय युक्त परियोजनालाई संघीय सरकारसँगको समन्वयमा प्रदेशको महत्त्वपूर्ण योजनाको रूपमा अघि बढाइने प्रदेश सरकारले नीति तथा कार्यक्रममा उल्लेख छ ।
यस्तै नीति तथा कार्यक्रम एक स्थानीय तह एक नर्सरीको अवधारणा ल्याएको छ । गौतम बुद्ध विमानस्थल सञ्चालनलाई अवसरको रूपमा लिँदै पर्यटन र पूर्वाधार विकासको लागि थप काम गर्ने उल्लेख छ । कृषिको उत्पादकत्व वृद्धि हुने कार्यक्रमका साथै बालिएको पहिचान गरी एक जिल्ला एक निर्यातको अवधारणामा जोड दिने उल्लेख छ । माटो सुधार कार्यक्रम ल्याएको छ । माछा र मासु उत्पादनमा विशेष कार्यक्रम ल्याइने उल्लेख छ ।
२५ जेष्ठ २०७९, बुधबार १६:३९ प्रकाशित
