राष्ट्रिय क्रिकेट टिमका पूर्व कप्तान पारस खड्का र राष्ट्रिय महिला पुटबल टिमकी सदस्य सावित्रा भण्डारी दशककै उत्कृष्ट खेलाडी घोषित भएका छन् ।
नेपाल खेलकुद पत्रकार मञ्च (एनएसजेएफ) ले मंगलबार आयोजना गरेको १८औं संस्करणको पल्सर स्पोर्टस अवार्ड समारोहमा पारस पुरुषतर्फ र सावित्रा महिलातर्फ प्लेअर अफ दि डिकेड घोषित भए ।
टिमकै कारण आफू यो अवार्ड पाउन सफल भएको भन्दै पारसले अवार्ड क्रिकेट टिमलाई समर्पित गरे । उनले भने, ‘टिम बिना म केही होइन, सबै टिमकै कारण संभव भएको हो ।’
वर्ष खेलाडी पुरुष, वर्ष खेलाडी महिला र वर्ष प्रशिक्षकको विधामा केही परिमार्जन गर्दै यस पटक यी तीन विधामा दशककै उत्कृष्ट खेलाडीलाई अवार्ड प्रदान गरिएको हो । दशककै उत्कृष्ट खेलाडी बनेका पारस र सावित्राले बजाज पल्सर मोटरबाइक प्राप्त गरेका छन् ।
८ चैत्र २०७८, मंगलवार २०:०२ प्रकाशित
