हाल देशभरको मौसाममा सामान्यदेखि पूर्ण बदली रहेको छ । प्रदेश १, प्रदेश २, बागमती प्रदेश, गण्डकी प्रदेश, र लुम्बिनी प्रदेशका केही स्थानहरूमा हल्कादेखि मध्यम वर्षा भईरहेको छ । मनसुनी बायुको प्रभावका कारण आज र भोलि देशका धेरैजसो ठाउँमा बर्षा हुने मौसमविद्ले बताएका छन् । मनसुनको न्युन चापिय रेखा नेपालको तराई भू–भाग नजिक रहेकोकाले त्यस क्षेत्रमा अधिक बर्षा भैरहेको छ । विगत दुई दिनयता सबैभन्दा धेरै नवलपरासी पूर्व र पश्चिममा पानी परेको छ । देशका विभिन्न १३ वटा वर्षा मापन भएको छ ।
मौसमविद्का अनुसार नवलपरासी पूर्व र पश्चिम, रुपन्देही, कपिलवस्तु, सिन्धुली, चितवन र धनुषाका वर्षामापन केन्द्रहरुमा ठूलो वर्षा मापन गरिएको छ । मौसमविद् प्रतिभा मानन्धरले अझै केही दिन पानी पर्ने सम्भावना रहेको बताएकी छन ।
तराईको भू–भाग नजिकै रहेको न्यूनचापीय रेखा तल नझरेसम्म मौसम नखुल्ने मौसमविद्ले बताएका छन् । देशको अधिकांस भू(भागमा सामान्य देखि पूर्ण बदली रही धेरै स्थानहरुमा हल्का देखि मध्यम वर्षाको सम्भावना रहेको छ। आज प्रदेश १, गण्डकी, लुम्बिनी, कर्णाली र सुदुरपश्चिम प्रदेशका थोरै स्थानहरुमा मेघ गर्जन र चट्याङसहित भारी बर्षाको सम्भावना रहेको छ ।
त्यस्तै, आज राति प्रदेश १, वाग्मती, गण्डकी, कर्णाली र सुदूरपश्चिम प्रदेशमा ठूलो पानी पर्ने जल तथा मौसम विज्ञान विभाग अन्तर्गतको मौसम पूर्वानुमान महाशाखाले जनाएको छ । लगातारको वर्षा जारी रहेकाले तराईका जिल्लामा डुबानको जोखिम उच्च छ । त्यस्तै, बाढी पहिरोको खतरा पनि रहेकाले सावधानी अपनाउन महाशाखाले आग्रह गरेको छ ।
१३ भाद्र २०७८, आईतवार ०७:४१ प्रकाशित
