बिहिबार रातिबाट अवरुद्ध रहेका लुम्बिनी प्रदेशका विभिन्न राजमार्ग अझै खुलेका छैनन् । पूर्वपश्चिम राजमार्ग सहित लुम्बिनी विभिन्न वटा ठुला मागहरू अवरुद्ध बनेका थिए । ती मार्गहरूमा आज दिनभर पानी रोकिएमा आज साँझदेखि खुल्ने लुम्बिनी प्रदेश ट्राफिक प्रहरी कार्यालय बुटवलले जनाएको छ ।

ट्राफिक प्रहरीका अनुसार नवलपरासी (पश्चिम) बर्दघाट नगर पालिका-१० लण्डनबृज स्थित (पूर्व-पश्चिम) राजमार्ग सडक खण्ड र बासा, भुताहा र सुनवल नगरपालिका-१२ बडेरा स्थित रहेको डाईभर्सन बगाएपछि बाटो अवरोध रहेको छ । यस्तै रुपन्देही देवदह नगर पालिका-९ स्थित घोडाहा खोलामा पुल भासिदा (पूर्व–पश्चिम) राजमार्ग सडक खण्डमा अवरोध रहेको लुम्बिनी ट्राफिक प्रहरी कार्यालय बुटवलका प्रहरी नायव उपरीक्षक डिल्लीनारायण पाण्डेले बताए । यस्तै आज बिहानबाट भैरहवा भुमही हुलाकी मार्ग पनि अवरुद्ध भएको छ । उक्त मार्गमा पर्ने नवलपरासीको माहुरी खोलामा पुल भासिँदा सडक अवरुद्ध भएको हो । पुल भासिन थालेपछि ठुला गाडीहरूको आवतजावतमा रोक लगाएको पाण्डेले बताए । यस्तै अस्ति रातीबाट अवरुद्ध गुल्मी रुरु गाउँपालिका २ पोखरी बगर स्थित (रिडी-रुद्र बेनी) सडक खण्ड अझै खुल्न सकेको छैन् ।

यता अवरुद्ध अर्घाखाँची शितगंगा नगरपालिका-१२ बसेरी स्थित (गोरुसिङ्गे-सन्धिखर्क) सडक खण्डमा र पाल्पा रम्भा गाउँपालिका-३ सीतापहाड स्थित सिद्धार्थ राजमार्ग भने सञ्चालनमा आएका छन् । डिभिजन सडक कार्यालय बुटवलका प्रमुख जयराज मरासिनीले अवरुद्ध सडकहरू खुलाउने पहल भइरहेको बताए ।