नेकपा माओवादी केन्द्रको भातृसङ्गठन वाईसीएल बाँके र अखिल क्रातिकारीले प्रधानमन्त्री केपी शर्मा ओलीको पुत्ला दहन गरेका छन । बुधबार बाँकेको कोहलपुरस्थित डुडुवा खोलाको समशानघाटमा प्रधानमन्त्री ओलीको धार्मिक संस्कार अनुसार चितामा राखेर पुत्ला जलाईएको वाईसिएल बाँकेका संयोजक आकाश कार्कीले जनाएका छन ।

प्रधानमन्त्री ओलीले एकपछि अर्को असंवैधानिक, अलोकतान्त्रिक, निरंकुश र प्रतिगामी कदम चाल्दै गईरहेको भन्दै त्यसको बिरोध स्वरुप प्रधानमन्त्री ओलीको पुत्लासहित कोहलपुर बजार परिक्रममा गरी समशानघाटमा पुत्ला जलाईएको कार्कीले बताए ।

नगर परिक्रमाका क्रममा वाईसिएल र अखिल क्रान्तिकारीमा आवद्ध युवाहरुले ‘हामीलाई भ्याक्सिन चाहिएको हो, निर्वाचन होइन्, तिम्रो बयलगाडा लैजाउ, हाम्रो गणतन्त्रको अपहरण नगर, केपी ओली जस्तो प्रधानमन्त्री कुनै पनि मुलुकले भोग्नु नपरोस’ जस्ता नारा लगाएका थिए । प्रधानमन्त्री ओलीको पुत्ला सहित नगर परिक्रमा गरेका युवाहरुले समशानघाटमा धार्मिक विधि अनुसार पुत्ला जलाएका थिए ।