जनता समाजवादी पार्टी (जसपा)का अध्यक्ष महन्थ-राजेन्द्र पक्ष प्रधानमन्त्री केपी शर्मा ओली नेतृत्वको सरकारमा सभागी हुने निश्चित भएको छ ।
बालुवाटारमा आज प्रधानमन्त्री ओलीसँग जसपाका अध्यक्ष महन्थ ठाकुर र नेता राजेन्द्र महतोबीच भएको वार्ता सकारात्मक भएको हो । वार्तामा सहभागी एमाले स्थायी कमिटी सदस्य सुवास नेम्वाङका अनुसार जसपा ८ मन्त्रालयसहित सरकारमा सहभागी हुने निश्चित भएको हो ।
‘जसपा सरकारमा सहभागी हुन तयार नै रहे पनि एकरदुई दिन अझै समय लाग्ने उनले बताए । जसपा ८ मन्त्रालयसहित सरकारमा सहभागी हुने निश्चित भइसकेको छ ।’ उनले भने ।
बैठक १० बजेदेखि २ बजेसम्म चलेको थियो । भेटमा मुद्दा फिर्ता र सरकारमा सहभागीताका विषयमा छलफल भएको जसपाका नेता लक्ष्मणलाल कर्णको भनाई छ ।
‘प्रधानमन्त्रीले सरकारमा आउनुस्, सँगै काम गरौं भन्नुभयो । हामीले पार्टीमा आपसमा कुरा गरेर भन्छौं भनेका छौं’ नेता कर्णले भने । ‘सरकारमा त जाने नै हो, ८ मन्त्री र २ राज्यमन्त्री लिने भनेर अध्यक्ष महन्थजीले भनिसक्नुभएको छ’ उनले भने ।
ओलीले राखे प्रस्ताव
प्रधानमन्त्री ओलीले आफू राष्ट्रिय सहमतिको सरकार बनाउन अग्रसर भएको भन्दै जसपाका नेताहरूलाई सरकारमा सहभागी हुन आग्रह गरेका छन् ।
बालुवाटारमा जसपा अध्यक्ष महन्थ ठाकुरसहितका नेताहरूसँगको छलफलमा प्रधानमन्त्री ओलीले राष्ट्रिय सरकार बनाउने प्रस्ताव गरेको नेम्वाङको भनाई छ ।
स्रोतका अनुसार पार्टीभित्र सर्वसम्मत निर्णय बनाउने वा कार्यकारिणी समितिमा पनि बहुमत जुटाएर निर्णय गर्नका लागि ठाकुर पक्षले समय मागेका छन् ।
जसपामा एकले अर्को पक्षलाई कारवाहीको तयारी गरिरहेकै बेला ठाकुर पक्ष दल यति दल विभाजन भए पनि आधिकारिकता पाएर सरकारमा सहभागी हुने तयारीमा जुटेका छन् ।
बालुवाटारमा आज भएको छलफलमा एमालेबाट प्रधानमन्त्री तथा अध्यक्ष ओलीसहित महासचिव ईश्वर पोखरेल, अर्थमन्त्री विष्णु पौडेल र नेता सुवास नेम्वाङ सहभागी थिए । जसपाबाट अध्यक्ष ठाकुरसहित राजेन्द्र महतो, शरदसिंह भण्डारी, सर्वेन्द्रनाथ शुक्ल र लक्ष्मणलाल कर्ण सहभागी थिए ।
ठाकुरले मागे सहयोग
जसपाका अध्यक्ष महन्थ ठाकुरले पार्टीको विवाद समाधानका लागि सहयोग पुर्याउनका प्रधानमन्त्री ओलीसँग आग्रह पनि गरेका छन् । आजको बैठकमा अध्यक्ष ठाकुरले प्रधानमन्त्री ओलीलाई पार्टी विवादकै बीचमा सरकारमा सहभागी भयो भने झन विवाद बढ्ने र आफ्नो आधिकारिता गुम्ने भएकाले त्यसलाई चाँडै टुंगो लगाएर मात्र सहभागी हुने स्पष्ट पारेका हुन् ।
जसपा केन्द्रीय समितिमा ४० प्रतिशत पुर्याउनेले मात्र पार्टीको आधिकारिकता पाउने राजनीतिक दल सम्बन्धी ऐनलाई संशोधनका लागि आग्रह गरेको हो ।
अध्यक्ष ठाकुरसँग केन्द्रीय समिति तथा कार्यकारिणी समितिमा ४० प्रतिशत बहुमत नपुग्ने भएपछि सरकारमा सहभागी हुनका लागि प्रधानमन्त्रीसँग अझै समय मागेको स्रोतको भनाई छ । ठाकुर पक्षले आफ्नो पक्षमा बहुमत नपुगेको कारण पार्टी अलग गर्न नसकिरहेको कुरा प्रधानमन्त्री ओलीसमक्ष राखेको बताइएको छ ।
सरकारमा सहभागी भए पार्टीको सदस्य स्वतः रद्द हुने निर्णय कार्यकारिणी समितिको बैठकले गरेको छ । जसपामा एकले अर्को पक्षलाई २४ घण्टे स्पष्टीकरण सोधेका छन् ।
१७ जेष्ठ २०७८, सोमबार १७:१७ प्रकाशित
