१६ चैत्र २०८०, शुक्रबार
कर्णाली भित्रिने नाकामा ‘हेल्थ डेस्क’ राखिने
  • काँचुली खबर

भारतमा कोरोना भाइरस (कोभिड-१९) को संक्रमण बढेसँगै कर्णालीमा पनि सतर्कता अपनाउन थालिएको छ । कर्णाली प्रदेश भित्रिने तीनवटा सीमा नाकामा पुनः ‘हेल्थ डेस्क’ स्थापना गरिने भएको छ ।

कर्णाली प्रदेश भित्रिने नाका सल्यानको कपुरकोट, बाँके र सुर्खेतको सिमाना बबई र पञ्चपुरीको जामुलगायतका स्थानमा हेल्थ डेस्क पुनः स्थापना गर्न लागिएको प्रदेश स्वास्थ्य निर्देशक डा. रविन खड्काले बताए ।

‘भारतमा संक्रमणको दर पुनः बढेपछि कर्णालीमा पनि सतर्कता अपनाउनुपर्ने देखिन्छ, खुल्ला सीमाका कारण नयाँ भाइरस सहजै भित्रिन सक्ने भएकाले हामीले पहिलो चरणमा प्रदेश भित्रिने नाकामा कडाइ गछौं,’ निर्देशक खड्काले भने ।

निर्देशक खड्काका अनुसार ‘हेल्थ डेस्क’मा ज्वरो नाप्नुका साथै कोभिडको लक्षण देखिए एन्टिजोन प्रविधिबाट पीसीआर परिक्षणसमेत गरिनेछ । रिपोर्ट पोजेटिभ आए आइसोलेसनमा राखेर उपचार गरिनेछ । र, सीमा नाकाहरूबाट आउने व्यक्तिहरूको अनिवार्य अभिलेख समेत राखिने छ ।

यस्तै हाल बन्द रहेका कर्णाली स्वास्थ्य विज्ञान प्रतिष्ठान पीसीआर प्रयोगशाला जुम्ला, दैलेख अस्पताल र चौरजहारी नगरपालिका रुकुम पश्चिम प्रयोगशालालाई तयारी अवस्थामा राखिनेछ । र, प्रदेशका विभिन्न स्थानमा स्थापना गरिएका आइसोलेसनहरुलाई पनि पुनः स्थापना गरिने निर्देशक खड्काले बताए ।

  • ११ चैत्र २०७७, बुधबार १८:४९ प्रकाशित
  • Nabintech