प्रहरीले कोहलपुर नगरपालिका वडा नं. २ बाट रेडपाण्डाको छाला सहित ५ जनालाई नियन्त्रणमा लिएको छ । जिल्ला प्रहरी कार्यालय बाँके तथा ईलाका प्रहरी कार्यालय कोहलपुरबाट खटिएको प्रहरी टोलीले कोहलपुर वडा नं. २ स्थित सन्ध्या लक्ष्मी खाजा घरबाट दुर्लभ रेडपाण्डाको छाला सहित ५ ब्यक्तिलार्इ नियन्त्रणमा लिएको जनाएको छ ।
पक्राउ पर्नेहरुमा कोहलपुर नगरपालिका वडा नं. १ बस्ने ४६ वर्षका बुद्धि शर्मा, कोहलपुर नगरपालिका वडा नं. २ बस्ने २८ वर्षका मुकेश दमाई, बैजनाथ गाउपालिका वडा नं. ४ बस्ने ४१ बर्षका थमन दमाई, सोही स्थान बस्ने २८ वर्षका दिपक सुनार र २१ बर्षका बलराज ऐडीलाई पक्राउ गरिएको ईलाका प्रहरी कार्यालय कोहलपुरले जनाएको छ ।
विशेष सुचनाका आधारमा खटिएको प्रहरी टोलीले रेड पाण्डाको छाला लुकाईराखेको अवस्थामा घटनास्थलबाटै उनिहरुलाई पक्राउ गरिएको र आवश्यक छानबिनकालागि प्रक्रिया अगाडी बढाईएको प्रहरी स्रोतले काँचुली खबरलाई जानकारी दियो ।