३० असार, काठमाडौँ । सरकारले क्यान्सर उपचारमा प्रयोग हुने ३७ प्रकारका औषधि चार अस्पतालबाट निःशुल्क रूपमा उपलब्ध गराउने भएको छ ।

स्वास्थ्य तथा जनसंख्या मन्त्रालयले औषधि प्राप्त गरेपछि क्यान्सर उपचारमा संलग्न चार अस्पताल बाँकेको सुशील कोइराला प्रखर क्यान्सर अस्पताल, भक्तपुर क्यान्सर अस्पताल, बीपी कोइराला मेमोरियल क्यान्सर अस्पताल, भक्तपुर क्यान्सर अस्पताल र वीर अस्पतालमा क्यान्सर रोगको औषधि उपलब्ध गराउने स्वास्थ्य तथा जनसंख्या मन्त्रालयका स्वास्थ्य शिक्षा प्रशासक तथा सूचना अधिकारी डा. भक्त केसीले बताए ।

स्वास्थ्य मन्त्रालयको पहलमा वन हर्ट वर्ल्डवाइड संस्थामार्फत नेपाल सरकारले ३७ प्रकारका औषधि सहयोग प्राप्त गरेको हो । स्तन, छाला, तथा विभिन्न खालका क्यान्सर उपचारमा आवश्यक पर्ने औषधि नेपालका चार अस्पतालमा निरन्तर पाँच वर्षसम्म विभिन्न क्यान्सर रोगका औषधि उपलब्ध गराइने प्रशासक तथा सूचना अधिकारी डा. केसीले बताए ।

कहिले आउँछ औषधि ?

सरकारले क्यान्सरका बिरामीलाई एक लाख सम्मको निःशुल्क स्वास्थ्य उपचार गराउँदै आएको छ । त्यसमा थप निःशुल्क औषधि उपलब्ध गराउन लागिएको मन्त्रालयका प्रशासक तथा सूचना अधिकारी डा. केसीले बताए ।

यद्यपि सरकारले स्वास्थ्य बीमामा आबद्धलाई साउन १ देखि क्यान्सरलगायत आठ जटिल रोगहरूको उपचारकालागि दुई लाखसम्मको स्वास्थ्य सेवा उपलब्ध गराउने निर्णय गरेको छ । स्वास्थ्य बीमामा आबद्ध भएकाहरूले थप निःशुल्क रूपमा क्यान्सर रोगको औषधि यी चार अस्पतालबाट पाउन सक्नेछन् । स्वास्थ्य मन्त्रालयले क्यान्सरको औषधि प्राप्तिका लागि नीतिगत प्रक्रिया अगाडि बढाएको प्रशासक डा. केसीले बताए । ‘औषधि आउने निश्चित भयो, मन्त्रालयले औषधिका लागि प्रक्रिया अगाडि बढाइरहेको छ । औषधि आउन केही समय लाग्छ । यही दिन आउँछ भन्न अहिले सकिँदैन,’ डा. केसीले भने ।

यसअघि पाटन, वीरलगायत अस्पतालहरूले विभिन्न माध्यमबाट क्यान्सरको औषधि वेलावेला उपलब्ध गराउने गरेको उनले बताए । त्यही क्रममा केही बिरामीलेले उलब्धताका आधारमा निःशुल्क औषधि प्राप्त गर्दै आएका थिए ।

नेपाललगायत अन्य राष्ट्रहरूमा क्यान्सरको औषधि अध्ययन भइरहेकाले अस्पतालहरूले निःशुल्क रूपमा प्राप्त गर्ने गरेको डा. केसीले जानकारी दिए । ‘अस्पतालहरूमा विभिन्न माध्यमबाट प्राप्त भएका औषधि कम मात्रा बेलाबेला उपलब्ध गराइन्थ्यो । अहिले सरकारले पहिलो पटक क्यान्सरको औषधि निःशुल्क उपलब्ध गराएको हो,’ उनले भने ।

औषधि क-कससले पाउँछन् ?

तर निःशुल्क रूपमा दिइने औषधिहरू सबैले भने प्राप्त गर्न सक्दैनन् । यस्तो औषधि विपन्न नागरिकले मात्र निःशुल्क पाउने स्वास्थ्य मन्त्रालयले जनाएको छ । रोगको उपचार र औषधि प्राप्त गर्न बिरामीले भने कागजातहरू बनाउनुपर्छ ।

विपन्न बिरामीले स्थायी बसोबास भएका वडाको सिफारिसमा पालिकाको सिफारिस पत्रसहित सम्बन्धित अस्पतालमा सम्पर्क गर्नुपर्ने सूचनाअधिकारी डा. केसीले बताए ।

सिफारिस पत्रमा उल्लेख गर्नुपर्ने विवरणहरू

– बिरामीको नाम थर र ठेगाना र १६ वर्षमुनिका भए जन्म दर्ता र सम्पर्क नम्बर
– उपचारका लागि तोकिएको अस्पतालको सिफारिस, रोग पहिचान भएको चिकित्सकको प्रिस्किप्सनको संक्षिप्त व्यहोरा
– बिरामी विपन्न नागरिक भएको व्यहोरा खुल्ने पत्र