९ साउन, नेपालगन्ज । काजकिस्तानमा सम्पन्न भएको ११औँ अन्तर्राष्ट्रिय स्ट्रेन्थ लिफ्टिङ च्याम्पियनसिपमा स्वर्ण र रजत पदक जितेर फर्किएका बाँकेका दुई जना खेलाडीलाई जमुनाहा नाकामा स्वागत गरिएको छ ।
१५ जुलाईदेखि १९ जुलाईसम्म सञ्चालन भएको अन्तर्राष्ट्रिय स्ट्रेन्थ लिफ्टिङ प्रतियोगितामा नेपालगन्जका खेलाडी करण बाडियाले ६० केजीमा दुई वटा स्वर्ण र मोहित गुप्ताले ६८ केजीमा रजत र एउटा कांस्य पदक जितेका थिए ।
पदक जितेर भारतको बाटो भएर फर्किएका दुबैजना खेलाडीलाई नेपालगन्जस्थित जमुनाहा नाकामा भव्य स्वागत गरीएको हो ।
पहिलो पटक यसरी अन्तर्राष्ट्रिय प्रतियोगितामा सहभागी भएर पदक जित्न पाएकोमा निकै गौरवको अनुभूति भइरहेको बताउँदै रजत र एउटा काँस्य पदक बिजेता गुप्ताले स्ट्रेन्थ लिफ्टिङमा नेपाली खेलाडीहरूलाई पदक जित्ने राम्रो अवसर रहेको बताए ।
अन्तर्राष्ट्रिय स्ट्रेन्थ लिफ्टिङ च्याम्पियनसिपमा नेपालको लागि पदक जितेर फर्किने क्रममा भारतका लागि नेपाली दूतावासले पनि दिल्लीमा एक कार्यक्रम गरेर विजेता खेलाडीहरूलाई स्वागत सम्मान गरेको थियो ।
खेलाडी गुप्ताका अनुसार नेपालका लागि पदक प्राप्त गर्ने खेलाडीहरू केदारेश्वर मान, सानु कान्छा लामा, अमर लामा, अमृता खडका शेर्पा, करण बाडिया र आफूलाई भारतका लागि नेपालका राजदूत शङ्करप्रसाद शर्मा, नियोगका उपप्रमुख सुरेन्द्र थापा लगायतले स्वागत सम्मान गरेका थिए ।
नेपालका लागि ठुलो मात्रामा पदक जितेर राष्ट्रको इज्जतलाई संसारभर उच्च राख्न सफल भएतापनि अधिकांश खेलाडीले आफ्नै खर्चमा प्रतियोगितामा भाग लिएको दुखेसो नेपालगन्जका खेलाडी मोहित गुप्ताको छ ।
उनले भने, “आशा गरौँ अन्तर्राष्ट्रिय स्तरमा राष्ट्रिय गौरवलाई उच्च राख्ने हामी खेलाडीहरूलाई नेपाल सरकारले न्यायपूर्ण रूपमा सम्बोधन गर्ने छ ।”
९ श्रावण २०८१, बुधबार १६:५१ प्रकाशित
