१४ पुस, काेहलपुर । सातौं अन्तर मावि मेयर कप तथा १६ औं पालिका स्तरीय राष्ट्रपति रनिङ्गशिल्ड खेलकुद छनौट प्रतियोगिताकाे उपाधि बालविद्या माध्यामिक विद्यालयले उचालेको छ । काेहलपुर नगरपालिका अन्तर्गतकाे खेलकुद विकास समितिकाे संचालन तथा ब्यवस्थापनमा शुक्रबार सम्पन्न प्रतियोगितामा कुल १६ मेडल प्राप्त गर्दै बालविद्याले उपाधि चुमेकाे हाे ।

बालविद्याले ८ स्वर्ण, २ रजत र ६ कास्य प्राप्त गर्याे । यस्तै त्रिभुवन माध्यामिक विद्यालयले ८ स्वर्ण, १ रजत र ३ कास्य प्राप्त गरी द्धितीय भएको छ भने गोरखा यूनाईटेडले ६ स्वर्ण, १ रजत र ५ कास्य प्राप्त गरी तृतिय भएको छ ।

यस्तै एथ्लेटिक्सतर्फ छात्र प्रतिक सुनार र छात्रा तुलसा दमाई, भलिबल तर्फ छात्र सन्दिप रावत र छात्रा ग्रेष्णा चिलवाल र कवडीमा छात्र गणेश आले मगर र छात्रा सरिता बुढा उत्कृष्ट खेलाडीका रुपमा मेडल र प्रमाण पत्र प्रदान गरिएको थियो ।

यस्तै कृष्ण माध्यामिक विद्यालयलाई अनुशासनका रुपमा मेडल र प्रमाण पत्र प्रदान गरिएको थियो भने मार्च पासमा प्रथम वेस्टर्न माविलाई प्रमाण पत्र प्रदान गरिएको थियो ।

प्रतियोगितामा ३६ माध्यामिक विद्यालयका १ हजार ३ सय ६७ जना खेलाडी (छात्रछात्रा)हरुले सहभागीता जनाएको आयोजक समितिका सदस्य सचिव वीरेन्द्र मल्लले जानकारी दिए ।

कोहलपुर खेलकुद विकास समितिको व्यवस्थापन र सञ्चालनमा भएको प्रतियाेगिताका विजयी खेलाडीहरुलाई नगर प्रमुख, नगर उपप्रमुख, वडाअध्यक्ष, खेल प्रशिक्षक लगायतले मेडल तथा प्रमाणपत्र र पुरस्कार वितरण गरेका थिए । कोहलपुर नगरपालिका २ तेह्र विघा खेलमैदानमा भएको प्रतियोगितामा जनप्रतिनिधि, खेलकुदकर्मी, प्रहरी प्रशासन, खेलप्रेमी लगायतको उपस्थिति रहेको थियो ।