१६ भदाै, काेहलपुर । जिल्ला ट्राफिक कार्यालय बाँकेमा हालै सरूवा भएर आएका प्रहरी निरिक्षक गाेपिकृष्ण सुवेदीले जिल्लामा केही नयाँपन दिनेगरी काम गर्ने बताएका छन । मुस्ताङबाट हालै सरुवा भएर ट्राफिक प्रमुखका रूपमा बाँके आएका सुवेदीले शनिबार संचारकर्मिहरूसँग यस्ताे बताएका हुन ।

ट्राफिक प्रहरी कार्यालय बाँकेको आयोजनामा शनिबार कोहलपुरमा उपलब्ध पत्रकारहरुसँगकाे अन्तर संवाद कार्यक्रममा  बाेल्दै सुवेदीले ट्राफिक ब्यवस्थापन र दुर्घटना न्युनिकरणमा आफू केन्द्रित हुने बताए ।

जिल्लामा ट्राफिक ब्यबस्थापन र दुर्घटना न्युनिकरणका बिषयमा पत्रकारहरुविच राय सुझाव लिंदै प्रहरी निरीक्षक सुवेदीले आफ्नो क्षेत्राधिकार भित्र रहेर कार्ययोजनाका साथ ट्राफिक सचेतना, ट्राफिक संकेत एवं सवारी साधन तथा अटो रिक्सा ब्यबस्थापनमा कडाईका साथ लाग्ने बताए ।

पत्रकारहरुको प्रश्नको जवाफ दिंदै सुबेदीले सवारी नियम उलंघन गर्ने मापसे तथा लापसे चेकिङलाई कडाईका साथ लागु गर्नुकासाथै हरेक जरीवानाहरु डिजिटल पेबाट गर्ने नियम बाँके जिल्लामा श्रावण महिना देखि लागु भईसकेको जानकारी दिए । उनले कुनै ट्राफिक प्रहरीले चिट काटेर नगद लिएको सुचना पाए कारवाहि गरिने भन्दै कोहलपुरका फुटपाथमा पार्किङ गरेर राखेका निजि सवारी साधनलाई हटाउने, जेब्रा क्रसिङमा सवारी साधन तथा अटो रिक्सा रोक्ने परिपाटिको अन्त्य गर्न एक हप्ते चालक सचेतना अभियान चलाईने समेत जानकारी दिए ।

बिद्यालय क्षेत्र र जेब्रा क्रसमा सवारी साधनको गति तिब्र हुने गरेको जनगुनासो समेत आएको भन्दै प्रहरी निरीक्षक सुबेदीले कोहलपुर क्षेत्रको चौराह क्षेत्र, बसपार्क क्षेत्र र नेपालगञ्जको अति ब्यस्त स्थानहरुमा बिशेष अभियान चलाई दुर्घटना न्युनिकरणमा अहम भुमिका खेल्ने गरि कार्य क्षेत्रमा खटिने बताए । अहिलेको डिजिटल युगमा डिजिटल कपिलाई ट्राफिक प्रहरीले किन मान्यता नदिएको हो भन्ने पत्रकारहरुको प्रश्नमा ट्राफिक प्रहरी प्रमुख सुबेदीले यस बिषयमा यथेष्ट जवाफ दिन सकेनन् भने राजस्व असुलि ट्राफिक प्रहरीको प्राथामिकता हो कि दुर्घटना न्युनिकरण भन्ने प्रश्नमा उनले नियम संगत सवारी साधन चलाए राजस्व रसिद काट्नै नपर्ने बताए ।

अटो रिक्सा र सवारी साधनहरु नागरिकको चहल पहल हुने स्थान, जेब्राक्रस र ब्रेकर रहेको ठाँउमा नियम मिचेर रोक्ने गरेको भन्दै प्रहरी निरीक्षक सुबेदीले यस प्रकारका साना साना ट्राफिक नियम उलंघनलाई समेत सुक्ष्म रुपले हेरीने बताए । जनशक्ति थोरै र कार्य क्षेत्र ब्यापक भएको सन्दर्भमा पनि बाँके ट्राफिक प्रहरीले जिल्लाका बिभिन्न स्थानमा ट्राफिक बिटहरुको स्थापना गरि सवारी ब्यबस्थापन गर्दै आएकाे सुवेदीले बताए ।

नेपालगञ्ज कोहलपुर सडक खण्डमा एकै दिन तीन चार ठाँउमा चेकिङ गरेर सवारी दुर्घटना न्युनिकरण भन्दा पनि सर्वसाधारणलाई दुख दिने गरेको भन्ने पत्रकारहरुको गुनासोमा प्रहरी निरीक्षक सुबेदीले सुचना र सञ्चारलाई चुस्त दुरुस्त पारेर नदोहरीने गरि ट्राफिक चेकजाँच गरिने बताए ।

नेपालगञ्जका एकलैनि, बागेश्वरी मन्दिर , त्रिभुवन चोक जस्ता स्थानहरुमा अटो रिक्साका कारण पैदल यात्रिहरुले सास्ति ब्यहोर्नु परेको विषयलाई समेत ट्राफिक प्रहरीले विशेष अप्रेसन गरि ब्यबस्थापन गरीने बताए । अटो रिक्साहरुमा बिभिन्न निर्माण सामाग्रिहरु बोक्ने गरेको भन्दै ट्राफिक पहरी निरीक्षक सुबेदीले उक्त कार्य निरुत्साहित गरिने बताए ।

पत्रकारसँगको अन्तर संबादमा पत्रकार महासंघ बाँकेका कार्यबहाक अध्यक्ष संगिन शर्मा, नेपाल पत्रकार महासंघ लुम्विनी प्रदेश सदस्य सरला सुबेदी, पत्रकारहरु हेमन्त वि.क., प्रमोद रिजाल, प्रदिप वाग्ले, कुशल दलामी, कपिल न्यौपाने, कृष्ण वलि, निर्मल आचार्य, टार्जन वलि, मार्सलराज संज्याल, हुमहरी भट्टराई, रविन्द्र सिंह ठकुरी, सिवानी वि.क., पुष्पराज हमाल, प्रिया स्मृती ढकाल, बिद्युत्मा रैका, सजन रोकाय, डिल्लि शाहि, प्रिया शाहि लगाएतका पत्रकारहरुको सहभागिता रहेको थियो ।