१३ भदौ, काठमाण्डौं । नेपालले एसिया कपमा घरेलु टोली पाकिस्तानका दुबै ओपनरलाई सुरुवातमा आउट गर्दै राम्रो सुरुवात गरेको छ । मुल्तान रंगशालामा टस जितेर पहिला ब्याटिङ रोजेको पाकिस्तानले १४ ओभरको समाप्तीमा २ विकेट गुमाउँदै ६५ रन बनाएको छ । कप्तान बाबर आजम र मोहम्मद रिजवान क्रिजमा छन् ।

तीव्र गतिका बलर करण केसीको छैटौं ओभरको तेस्रो बलमा एज लागेर ओपनर फखार जमान विकेटकिपर आसिफ शेखबाट १४ रनमा क्याच आउट भए । सातौं ओभरको पहिलो बलमा रोहित पौडेलले डाइरेक्ट थ्रोमा इमाम उल हकलाई ५ रनमा रन आउट गरे ।

आरिफ शेखले पाँचौं ओभरको पाँचौं बलमा इमाम उल हकलाई ब्यक्तिगत पाँच रनमा जीवनदान दिएका थिए । सोमपालको आउट साइड अफको बलमा प्वाइन्ट गल्लीमा आरिफले क्याच छाड्न पुगेका थिए । तर त्यो जीवनदान नेपाललाई धेरै भारी परेन ।