३ साउन, कोहलपुर । बाँकेको कोहलपुरमा रहेको कोहलपुर बृहत खानेपानी उपभोक्ता संस्थाको निर्वाचन कार्यतालिका सार्वजनिक भएको छ । गत जेष्ठ २० गते निर्वाचनको तालिका सार्वजनिक गरेतापनि विविध कारणले निर्वाचन स्थगित भएको थियो । निर्वाचन अधिकृत कार्यालयको बुधबार बसेको बैंठकले निर्वाचन प्रक्रिया सुरु गर्ने निर्णय गरेको छ ।

निर्वाचन अधिकृत कार्यालयले साउन १२ गते बृहत खानेपानी उपभोक्ता संस्थाको निर्वाचन गर्ने निर्णय गरेको हो । कार्यालयले मतदानको मिति तोक्दै ९ दिनको निर्वाचन तालिका सार्वजनिक गरेको छ । सार्वजनिक गरेको तालिका अनुसार निर्वाचन प्रक्रिया साउन ३ गतेदेखि सुरु भई १२ गते सम्पन्न हुनेछ ।

सार्वजनिक तालिका अनुसार साउन ३ गते मतदाता नामावली सार्वजनिक गर्ने, ४ गते मतदाता नामावली उपरदावी विरोध, दावी विरोध उपर छानविन, निर्णय र अन्तिम नामावली प्रकाशन, ५ गते उम्मेदवारी मनोनयन फारम वितरण तथा मनोनयन दर्ता, ६ गते उम्मेदवारी उपर दावी विरोध र उम्मेदवारको अन्तिम नामावली प्रकाशन तथा उम्मेदवारलाई निर्वाचन चिन्ह प्रदान, ७ गते नमुना मतपत्र वितरण र १२ गते मतदान, मतगणना र मतपरिणम घोषणा र प्रमाण पत्र वितरण सपथ ग्रहण गर्ने बताईएको छ ।

निर्वाचन अधिकृत टिकाराम ढकालले तालिका सार्वजनिक भएसंगै निर्वाचनको तयारी सुरु भएको जानकारी दिए ।