पुर्वमन्त्रीको ड्रागन खेती : पहिलो उत्पादन बजारमा

पूर्वमन्त्री लोकेन्द्र बिष्टमगरले सुरु गरेको ड्रागनखेतीले उत्पादन दिन सुरु गरेको छ । दाङको तुलसीपुर उपमहानगरपालिका-१८ मा ड्रागन खेती गरेका विष्ठले बिक्रि वितरणकालागि पहिलो उत्पादन तयार भएको सामाजिक संचालबाट जानकारी दिएका हुन ।

सम्भवत नेपालमै पहिलो पटक उत्पादन भएको उक्त फलको लाभ उठाउन चाहने ब्यक्तिहरुले पूर्वमन्त्री विष्ठसँग सम्पर्क गर्न सक्नेछन । पूर्वमन्त्री विष्ठले ६६ कट्ठामा ड्रागन फ्रुटखेती गर्दै आएका छन । विष्ठका अनुसार यो नेपालमा नै सबैभन्दा ठूलो क्षेत्रफलमा गरिएको ड्रागन खेती हो ।

रोग प्रतिरोधात्मक क्षमता धेरै भएको ड्रागन फल नेपालीहरुकालागि नौलो भएपनि पूर्वमन्त्रीले नै यसको खेती सुरु गरेपछि भने धेरैले चासो राख्न थालेका छन । यसअघि नेपालमा यो फ्रुट उत्पादन नभएपनि भियतनाम लगायतका देशबाट थोरै मात्रामा ल्याउने गरेको पूर्वमन्त्री विष्ठले जानकारी दिए । विदेशी ड्रागन फ्रुट प्रतिकेजी ७०० देखि १९ सय रुपैयाँसम्म किनबेच हुने गरेको छ ।

आफू मन्त्री हुँदा चीन गएको बेला उनले ड्रागन फ्रुट खाने अवसर पाएपछि यसबारेमा चासो लिएका थिए । यसले ग्याष्ट्रिक, कब्जियत, क्यान्सर, मुटुरोगलगायत मानव शरीरमा लाग्ने विभिन्न रोगसँग लड्न सक्ने क्षमता राख्छ ।

गर्मी ठाउँमा खेती गर्न सकिने यसमा १२ प्रकारका खनिज तथा भिटामिन पाइन्छ । जस्तोसुकै माटोमा गमला, छत तथा करेसामा लगाउन सकिन्छ । फल खाँदा मीठो नभए पनि औषधि गुणले भरिपूर्ण रहेको छ ।

https://www.facebook.com/lokendra.bistmagar.

यसको फलबाट आइसक्रिम, इनर्जी ड्रिंक, वाइन र ब्रान्डी बनाउन सकिन्छ भने यसको मुन्टालाई तरकारीका रुपमा प्रयोग गर्न सकिन्छ ।