मंसिर ७ मा नेपालगञ्ज म्याराथनको पाँचौं संस्करण

नेपालगञ्ज म्यारथनको पाँचौ संस्करण आगामी मंसिर ७ गते संचालन गरिने भएको छ । ‘शान्ति सदभाव र एकता, राष्ट्र निर्माणमा हाम्रो प्रतिवद्धता’ भन्ने मुल नाराका साथ संचालन गरिने म्याराथनको तयारी तिब्र पारिएको क्रियटिभ ह्याण्ड्सले जनाएको छ । दश वर्षे सशस्त्र द्वन्द्वको औपचारिक अन्त्य भइ बृहत शान्ति सम्झौता भएको दिन ०६३ मंसिर ५ गतेको स्मरणमा नेपालगञ्ज म्याराथन आयोजना थालिएको थियो ।

आयोजक क्रियटिभ ह्याण्ड्सका टिएस ठकुरीद्वारा जारी प्रेसनोटमा ट्राफिक व्यवस्था मिलाउन सहज हुने भएकाले मंसिर ७ (शनिबार) गते नेपालगञ्ज म्याराथनको पाँचौं संस्करण संचालन गरिने उल्लेख गरिएको छ । ‘नेपालगञ्ज म्याराथनको पाँचौं संस्करण भव्य गराउन व्यवस्थापन चुस्त र पुरस्कार राशीमा बृद्धि गर्ने तयारी गरेका छौं । पुरस्कार राशी भने केहि समयपछि सार्वजनिक गर्नेछौं’ प्रेसनोटमा भनिएको छ ।

यस वर्ष पुरुष खुल्लातर्फ म्याराथन, महिलाको हाफ म्याराथन, ५ किलोमिटर महिला तथा पुरुषको स्कुल स्तरीय तथा खुल्ला दौड समावेश गरिएको, त्यसैगरी ८ देखि १२ बर्ष उमेरसमुहको पनि दौड राखिएको छ भने शारीरिक रुपले अशक्तहरुको लागि पनि दौड स्पर्धा समेटिएको छ ।

यस बर्षदेखि ३ किलोमिटरको कर्पोरेट रन पनि राखिएको छ । यसमा जनप्रतिनिधि, चिकित्सक, इन्जिनियर, प्राध्यापक, वकिल, शिक्षक, पत्रकार तथा बिभिन्न पेशा र व्यवसायीहरुले सहभागिता जनाउनेछन् ।

खुल्ला म्याराथनतर्फ शीर्ष आठ जना तथा हाफ म्याराथनमा शीर्ष ६ जनालाई नगद तथा आकर्षक उपहारबाट पुरस्कृत गरिनेछ । अन्य सबै विधामा नगद पुरस्कार दिइनेछ । कर्पोरेट रनका विजेतालाई सरप्राइज पुरस्कार प्रदान गरिनेछ ।

नेपालगञ्ज म्याराथनको पहिलो संस्करणमा नेपाली सेनाका होमलाल श्रेष्ठ, दोस्रोमा सेनाकै कृष्ण बस्नेत, तेस्रोमा जुम्लाका दुर्ग बुढा र चौथो संस्करणमा नेपाल पुलिस क्लबका भुमिराज राई विजेता बनेका थिए । महिला हाफ म्याराथनमा नेपालकी नम्बर एक धाविका कान्छीमाया कोजु दुई संस्करणमा विजेता भएकी थिइन् ।